[行多步．睇多套]《日出前讓戀愛開始》愛情本身都是一種絕症

講得絕症愛情片相信大家唔解釋都知套戲講乜，如果有返咁上下大，1993年香港就有套袁詠儀嘅成名作《新不了情》，爾冬陞拍女新人從來都有一手，2003年張柏芝套《忘不了》又係，一拍就攞影后，無呢套戲亦唔會出咗當日童星原島大地做主角嘅愛情片《某日某月》。其實大部份香港人都幾長情，所謂愛情戲都一路追，如果你有睇港產愛情片就會明。

明明係一套典型美國西片，靚仔靚女愛情絕症四大元素就夠，點解喺度數港產片？事關有說法係當年《新不了情》啟發咗日本喺2006年拍另一套絕症愛情片《太陽之歌》，由 YUI 主演，咁當然加埋第五大元素唱歌。所以電影公司好應該攞新不了情嚟做個平行對照嚟宣傳。

呢對新人來頭唔細，男主角係謝霆鋒，唔係，意思係星二代，不過佢老竇係阿諾舒華辛力加，佢就叫 Patrick 阿諾舒華辛力加。女主角就係有過千萬 follower 嘅 IG 網紅 Bella Thorne (感覺都係非常 drama queen 嘅名人)，不過以戲論戲，女主角由戲裡病發之後演出漸入佳境，反而開頭因「見光死」而做隱型人嘅生活就略嫌說服力不足，反而女配角 Quinn Shephard 就演得自然又搶鏡。咁「諾仔」表現又如何呢？只能夠講佢一腼腆笑，我就諗起佢老竇，太似，但以新人擔正，演技都恰如其分。

反而我幾欣賞導演 Scott Speer 嘅處理手法，咁多種絕症，佢揀「見光死」，等女主角過一個彊屍式生活，一開始就交代點解女主角唔想話俾佢朝思暮想嘅男仔知佢有病，因為佢唔想人當佢係一個病人而唔當佢係人。喜歡 John green 小說嘅人都知，佢會用成套戲帶出呢個主題，反而女主角一開口就點咗題，然後母女線、友情線都安排得好，尤其父女線，演老竇嘅 Robert Riggle 非常到位，最後關頭回想以前嘅嚴厲對待實在感動。

作為年輕拖友絕對係值得一睇，而且選曲唔錯，如果女主角係有唱 live 嘅實力，就值得鼓勵，好到係會想 keep 隻 soundtrack 嘅程度，喜歡音樂嘅人可以留意。

生命有限，愛情無限，以有涯隨無涯，殆已，所以在臨死同青春同時發生嘅時間當中，就可以去到「浪漫到一起惹絕症」嘅無人之境。呢個亦係絕症乘絕症嘅成功方程式。

*參加 AIA VITALITY ，行得多換得多，免費戲飛隨時有，欲知詳請，可電郵聯絡

Fitz 連結: https://fitz.hk/?p=96621