Fitz > 生活 Life > [TED TALK有樂] 「好似唔使做咁」做保險最令人眼紅嘅地方

成日睇做保險嘅人嘅facebook,唔係去遊埠就係頒獎食飯,閒時做運動船P食好西仲要買名牌揸靚車,認真令人不解。但最不解唔係有錢使,大把人都有錢過做保險,醫生、律師、專業人士、紀錄部隊同做投資理論上都好搵過保險,但最大問題,佢地係有錢無時間使,工時長不在話下,要睇市嘅更加係全天候。

所以令人眼紅嘅係好似唔使做嗰吓乞人憎,而我想同大家研究研究嘅唔係點樣不勞而獲 (其實無可能),而係呢行經常講嘅時間管理,呢行都有唔少時間管理嘅金句。

1. 事有緩急輕重

做事就有分重要唔重要,急唔急,你日常工作大部份事都係急而唔重要,所以經常虛耗光陰,應完急又一日。重要又急當然會做。又唔急又唔重要當然無人做,而最大關鍵就係重要又唔急嘅事,例如運動。運動唔會有收入,唔做一年好快過,做一陣又唔會有咩得益,所以喺優先次序入面永遠都排到最後,同食埋呢餐先減同一道理。

所以保險呢行可以自由安排時間嘅人,自然可以先將重要而唔急嘅事,例如上興趣班同做運動排先。堅唔堅持就睇個人生唔生性。

唔少會用:MUST DO, SHOULD DO, LIKE TO DO 嚟分做邊樣先,我試過唔work,因為最終 LIKE TO DO 而又做到嘅極少,就等如一個不斷輪迴OT嘅打工仔,無好下場。LIKE TO DO 例如運動,有機會係重要而唔急嘅事。

2. 越忙越空閒

越忙越空閒本身呢句就有矛盾,但事實又真係。因為做保險最緊要用腦,先安排日程表,再去執行,同返朝九晚六唔同。做打工仔基本上唔想用腦,因為嗰十個八個鐘無論係點做都係咁嘅人工,但做保險唔同,計佣唔係計時薪。所以我地會 utilise 個時間表,接觸最多嘅人,做最多事,娛最多嘅樂,唔係就對唔住安排時間表嘅自由,呢個係冒收入不穩定嘅風險係換返嚟,所以喺面書去最多旅行,睇最多嘅戲,減最大嘅壓,對世界、對人保持好奇咁,咁就可以keep住有動力。

一句講哂你自己為每日每小時排好優先次序,而最重要就係安排時間個意識。休息、娛樂、工作、進修、運動、家庭,全部都係自己選擇,所以最典型係,呢三個鐘我預咗 HEA,咁有意識地 HEA 又係咪真HEA呢?大家都可以自行判斷。

所以,呢行本身無 magic,唯一係多咗一張以每小時計嘅時間表,當你望住你d空白間,你就明白未來一星期嘅生活,本來就可以由你完全掌握。

後記:最近睇咗一條TED,再喺「事有緩急輕重」呢句說話發展出第三種角度:Significance 去決定做唔做或者幾時做一件事。下次有機會再講。

留一句金句俾大家:你從來無時間管理,時間從來都向前行(唔理你鍾唔鍾意),你管理嘅只係你自己。

延伸閱讀:


更多:
Fitz Facebook專頁
[郁民教室] 10招提升睡眠質素
7大健康飲食生活法則
5種需要推翻的飲食常識

Fitz Life 生活


文章為作者意見,不代表Fitz立場。