42公里升呢51公里
51公里加上累升2450米，限12小時內完成。唔係有心搞到咁緊，主要因為賽事终點間學校係借番來，各位跑手完賽後，班義工仍要花時間將場地還完，清潔倒垃圾，洗廁所……，當然亦要應下個名，挑戰12小時，為左唔想太多参加者DNF，就要求有参加資格，以及1630在大帽山檢查站截一次。
言歸正傳，如果跑過100公里山赛者，對50公里可能當小菜一碟，但如果閣下只係42公里僅僅9小時内，下面攻略應該對你有用。
東洋山
首先，由起步到城門大壩這段，你應該跑過，知道頭段車路完左之後，就要上樓梯，有機會塞人，有需要爬頭就應禮貌開聲，否則呢段可以冇咗10分鐘。打東洋山呢個大佬之前，最好喺大藍湖補充下，不過唔好太飽，可以帶走少少，慢慢上慢慢食，有助消化。
城門
飛鵝山道及沙田坳道落斜為主，慢跑係必須，之後落到引水道，可以跑一段快行一段交替搞掂呢5公里，九龍水塘段有頗多可跑山徑及有樹蔭，係賺時間機會。到左大壩，完成距離一半多一點，應好好拉筋，因為之後要上龍門郊遊徑，尤其開頭的1公里梯級係個考驗。梯級之後有幾公里平路，可以再用跑行交替，過左川龍茶樓，轉上嘅自然教育徑石级雖然唔長，亦不宜過急。
----- 廣告 Ad -----
大帽山
到達大帽山檢查站，補给之後，除左拉筋，可用下個靚洗手間洗下臉，1公里真麥徑嘅大石级要逐级逐级上。因為夕陽在背後，到左大帽頂之字路，同樣可以跑行交替，上到白波，天色開始暗，應戴上頭燈。之後唔好衝落車路，因為好易膝蓋痛，逆走麥八去铅礦坳，雖然落斜為主，仍要小心中間幾段沙石路。到左鉛礦坳，如果身上有多過半公升水，可以用部份洗下面，因為此處洗手間經常無水，亦可減去不必要重量先至落山，小心落呢段大石板，尤其四頭肌有投訴嘅時間，落到車路，就唔好留力，衝個靚時間返终點！
26公里升呢42公里
玩過26公里者，不妨跳出舒適區，挑戰下42公里，唔使驚，一定冇路跑馬拉松42公里咁辛苦。點解？因為有12小時，可以跑下行下，中途可以休息下。
起步後兩公里
冇咁辛苦亦要有策略的，沙田坳至大埔呢段就稍後講少少啦，先由頭講起，起步後兩公里車路係上斜，快步行好過跑上去，雖然快少少，但攰好多，之後上衛奕信徑石级，要撐腰挺胸一步一步上，人地要爬頭就讓佢過，唔好做英雄同人鬥快，或者被人追住而自己快左，上左山脊後有段平路就不妨慢慢跑下，馬油塘村車路亦宜跑多啲。
黃麖仔及大藍湖
到左井欄樹站補完水就快快起行，之後上個细山，叫黃麖仔，上落都多青苔，小心，亦唔好停低餵蚊。到左大藍湖，食一啲，帶一啲上身，邊行邊食就打大佬東洋山，如果當日太陽猛烈，不妨打傘逐级上，千奇唔好怕醜，完賽重要啲，搞掂東洋山，你會好有成功感的，飛鵝山道及沙田坳道落斜為主，放開腳步跑下啦。
城門
到獅子亭站就拉筋加洗面， 不妨食多一點，因為引水道馬騮多，不應食。行下跑下就好快到九龍水塘。之後見梯级就行，平路就慢跑，多樹蔭應該唔太辛苦。大壩之後條畔塘徑，攰的話就會好似行極未完咁，可以用下玩耐力賽的心理方法，數標柜柱，W070, W071……，终點就係W090 後1公里左右，剩餘10公里，9公里……，咁樣就容易好多。
鉛礦坳落山
留意42公里係先要行少少麥理浩徑斜上草山的，唔同26公里直接衛奕信徑去到鉛壙坳，到站就再拉下筋，天色暗就開燈，唔好嫌麻煩，因為落大石板，兩腳落一级會慢少少，但安全完成至上，初玩42者就容易在此扭親。到左車路，跑去终點之前，整理下儀容，咁你幅终點相就會好醒神。
----- 廣告 Ad -----
相片來源: 苗圃挑戰12小時慈善越野馬拉松 Facebook專頁
Fitz 連結: https://fitz.hk/?p=99489
