《環球時報》報道,1月14日昆明長水國際機場,上演咗「驚天地泣鬼神」嘅一幕。話說,小王同3名同事去到昆明出差,回程前用50蚊人民幣 (下同) 買咗一箱30公斤嘅柑,諗住拎返屋企慢慢食,點知去到行李寄艙前發現,原來每公斤要收10蚊運費,即係要寄就要俾300蚊!

報道無講呢四位同事做咩職業,但係佢哋都唔願意俾呢三舊水,情急之下又要趕飛機,商量過後最後決定,即場食晒佢! 據報道所講,老王同同事就一齊企喺機場大堂,係咁食係咁食,足足用咗二三十分鐘,先至食晒30公斤嘅柑,仲拍片放埋上網,結果當然瘋傳。

咪以為故事就咁完結,返歸後第三日,4個人都上晒火,嘴角生晒水泡,仲話以後都唔想再食柑。老老實實,唔想俾三百蚊無問題,但係4個人寧願自己食晒30公斤都唔願意分啲俾人,最後搞到又上火又盛,仲唔係「搬起石頭砸自己的腳」?

有中醫提醒,一日食兩三個柑已經係極限,食得多糖份高之餘,仲會上火生痰,總之凡事去到咁盡,點都要還嘅。


資料: 環球時報

首頁 > 飲食 Diet > 嫌飛機寄艙費太貴 四男子機場鯨吞30公斤柑