由香港至英國,意大利至澳洲,呢幾個星期全球各國都出現超市搶購潮。如果你一時錯手買多咗,又唔想造成浪費,可以聽聽英國專家建議,將某些食物放入冰格保存,延長保鮮期。

1. 雞蛋

千祈唔好成隻雞蛋放入冰格,會爆開! 不過可以將生雞蛋打落蛋糕盤,或者放入密封器皿再保存,變咗冰嘅雞蛋可以正常食用,只要煮之前稍稍解凍就得。

2. 芝士

可將芝士磨碎後,以密實袋盛載然後放入冰格。
注意: 茅屋芝士 (Cottage Cheese) 效果不會太好。

3. 牛奶

牛奶放入冰格絕無問題,但要注意:

  • 解凍後嘅牛奶,飲之前要搖勻,唔係會有雜質沉澱
  • 牛奶變冰會膨脹,盛載時唔好用密封器皿
  • 作為調製奶茶咖啡之材料,可以將奶雪成冰粒,使用時再成粒奶冰加落去

4. 麵包

麵包三兩日就會發霉,如果放入冰格,可以放多幾日。

冰凍嘅麵包再以多士爐 (或易潔鑊) 烘一烘就可以正常食用。

5. 朱古力

朱古力水份唔多,放入冰格亦唔會太影響味道。不過留意解凍時,最後先放入雪櫃放蔬菜嗰格,令朱古力慢慢解凍,咁就唔會變晒形。

6. 乳酪

食用時唔使專登解凍,放喺室溫幾分鐘就食得。

7. 米飯麵食

直接搵器皿載住放入冰箱,食嘅時候拎去煮就得。 (按: 即係急凍稻庭烏冬)

值得留意,有科學家指食用雪過再加熱嘅碳水化合物 (如意粉、薯仔),可以幫到你減肥,所以善用你嘅雪櫃,除咗幫你慳到食物,仲可以令你食得更健康。

資料: Metro


文章為作者意見,不代表Fitz立場。

歡迎投稿: http://fitz.hk/contribute/

永誠
講求綠色、環保、天然的健康生活。推廣新一代健康生活文化。