圖: 麥當勞
美式M字頭快餐店，最近將「植物肉」(plant-based meat) 引入餐單，吸引唔少人試新嘢。好唔好食、足唔足料，真係見仁見智，不過大家更應該關心嘅係，呢啲「植物肉」(plant-based meat) 係咪比真肉更健康呢?
講Green唔講Health
有關餐廳嘅宣傳好巧妙，以口號「食green啲」嚟招徠，強調係「素食口味」。至於營養成份，對健康有咩影響，宣傳文字並無細講。不過，對一般人來說，「green」或「素食」呢啲字眼，好多時同健康食物掛勾，令人覺得食素更加健康。
所謂「植物肉」(plant-based meat) ，係用上植物蛋白質製成嘅仿真肉，通常採用大豆、小麥或豌豆等植物，抽取其蛋白質再加工，令其有肉類質感。之後加入人工色素同添加劑，令佢有肉嘅味道同外觀。近年呢啲植物肉有豬、牛、雞等風味，可製成炸雞或漢堡包。
----- 廣告 Ad -----
圖: 食物安全中心
「植物肉」雖然由植物製成，屬於素食。但係咪健康食品，就要視乎以下幾點:
- 添加劑: 人工色素或添加劑對人體害處未有定論，始終都係少食為妙。「植物肉」難以避免加入添加劑，唔係純天然。
- 含鹽量: 「植物肉」始終係加工食物，為咗防腐、為咗更有味道，亦要加入大量食鹽。食太多鹽會令血功上升、影響腎臟功能。
- 加入脂肪: 唔少品牌嘅植物肉，為咗令煎炸時有「滋滋聲」，以及令其賣相更佳，都會加入脂肪 (通常係椰子油)，進食過量脂肪會提升心血管疾病風險。
所以，政府「食物安全中心」亦呼籲，食用呢啲「植物肉」要睇清楚食物成份標籤，了解內裏所含添加劑同鹽含量，先好放心食用。
「新餐肉」Vs 長城牌餐肉
有網民喺超市比較兩款餐肉產品嘅營養成份，結果有驚人結果:
- 脂肪 (每百克): 新餐肉15.6g; 長城牌14g，新餐肉含脂肪更高。
- 鈉 (即鹽，每百克): 新餐肉 485mg; 長城牌 620mg。新餐肉雖比傳統餐肉少鹽，但份量亦唔少
- 蛋日質 (每百克): 新餐肉12.7g; 長城牌13.7g。
- 能量 (每百克): 新餐肉 833KJ; 長城牌 885KJ
依照營養標籤嘅數字，「植物肉」比起傳統午餐肉其實唔健康得幾多。
左為新餐肉，右為長城牌 (按圖放大)
----- 廣告 Ad -----
點解要食raw food ?
面對日新月異嘅食物加工產物，有人提倡 raw food (或 whole food)，要求食入口嘅嘢，都要係「真真正正」由大自然取得嘅食物。佢哋唔單止要同食物添加劑 say no，更要知道食物來源: 細微至每棵菜喺邊塊田種出，每隻雞、每塊肉係邊個農場出產等。
有人可能會覺得佢哋想法好極端，不過面對呢啲「講green唔講health」嘅加工「人造肉」，可能咁先可以保障我哋健康。
日本嘅剌身、壽司，被稱為 raw food 嘅佼佼者。
資料: Food Network、食物安全中心
