香蕉係全世界最多人食嘅生果,消耗量佔所有生果近40%,唔少民族都視香蕉為日常主食,重要性等同中國人嘅白米。不過,近年世界各地嘅香蕉果園,相繼出現導致「黃葉病」(俗稱「巴拿馬病」) 嘅真菌,令香蕉面臨滅絕危機。截至2021年1月,病菌已傳播至20個國家。

巴拿馬病有70年歷史

巴拿馬病 (Panama disease) 係由一種鐮刀菌引致樹木枯萎嘅疾病,最初見於上世紀50年代,當時只係攻擊一種叫 “Gros Michel” 嘅香蕉品種 (中譯大米七香蕉,美國稱 Big Mike),佢以香甜為賣點,亦因為皮厚唔易撞爛,方便運送全球各地,大受種稙者歡迎。後來巴拿馬病一發不可收拾,香蕉業界不得不改種令一品種: 香芽蕉 (Cavendish),所以巴拿馬病亦暫時得以控制。

不過,至1989年,台灣發現第一宗巴拿馬病攻擊香芽蕉個案,其後印尼及馬來西亞亦發現有染病案例,估計已傳至中國及印度。至2006年,日本沖繩、澳洲昆士蘭亦有官方報告。根據印度環保團體Down to Earth 嘅估計,2020年巴拿馬病已蔓延至全球17個國家,並已擴散到拉丁美洲。呢一年來,巴拿馬病亦由澳洲北部昆士蘭傳至新南威爾斯,傳播速度驚人,澳洲當局要關閉種稙場。而亞洲香蕉生產大國印度,亦有至少4個邦嘅香蕉受到影響。

澳洲早前因發現巴拿馬病而封閉種植場

種植方式難以抵擋感染

香芽蕉營養高,易入口,容易種植。而業界為求大量生產,都以「根莖」嘅方式種植。呢種方法好處係生長快,容易有收成,但壞處就係每個產地嘅香芽蕉樹,基因都係一模一樣,當有病菌針對性攻擊呢種香蕉,就變得難以應付。

染病嘅香蕉
染病嘅香蕉

巴拿馬病真菌會破壞香蕉樹內部,令佢迅速枯萎死亡。而佢嘅傳播方式係透過水,即係話可經雨水或灌溉系統被病菌傳播,令蕉農防不勝防。暫時業內人士,只能夠改變香蕉品種以應付呢場災禍,不過香芽蕉佔全球產量60%,係最流行嘅香蕉品種,要改種另一品種香蕉,無論喺實際執行以至推廣上,都成為業內一大挑戰。

未來日子,香蕉未必會絕種,只不過係香蕉嘅口味可能會大變。

資料: ABCDown to Earth維基百科


文章為作者意見,不代表Fitz立場。
歡迎投稿: http://fitz.hk/contribute/
首頁 > 飲食 Diet > 香蕉面臨滅絕危機 無敵真菌散播全球