呢個世界千奇百趣，食蛋都可以減肥，真係唔知嚇死定笑死。日本有人推廣「食蛋減肥法」，方法係咁:
- 每日乜都唔食，剩係食烚雞蛋
- 一日食25隻，咩時間食都得，總之要食晒
- 雞蛋可以點少少鹽，亦可以加少少調味料。辣醬、茄汁都得，不過唔可以太多
- 實行期間只可飲清水
真人Show實測
日本綜藝節目《それって!?実際どうなの課》，就搵咗藝人川合正悟真人示範。呢位中年藝人喺實測前有97.3公斤，3日後跌至93.6公斤，減咗3.7公斤即係8磅多少少。
呢位藝人咁食法，有無問題呢?
- 烚蛋好難消化，佢第一日食咗唔夠10隻，已經頂住個肚
- 第二日開始，見到雞蛋都驚
- 飽肚感覺到第二日都未消失，但仍然要食25隻烚蛋
- 佢第三日食咗9隻蛋宣佈放棄
營養師: 咁做為啲乜?
節目訪問嘅營養師話，每日只食雞蛋，就算食足25隻，都唔足以提供身體所需營養，所以連續3日咁食法，就算食到肚皮撐住，身體仍然缺乏熱量及營養。雖然因為咁，3日內足足減咗8磅，不過營養師注意到，藝人喺食蛋期間，精神處於痛苦狀態，對身體以至心理都無好處。此外，喺食返正常餐之後，體重應該會回升。
而日本討論區亦有人話跟足咁做，頭兩日每日減到2公斤。
喺度要提醒大家，呢啲咁極端嘅飲食方式，就算真係可以有效減重，但往往對身體有嚴重傷害，千祈咪亂試。仲有就係，飲食要均衡!
資料: Chukyo TV、Natalie Mu
講求綠色、環保、天然的健康生活。推廣新一代健康生活文化。
