Fitz > 飲食 Diet > 芫荽黨 vs 反芫荽黨: 臭定唔臭? 聞得到先叫臭!

近日網上有場「芫荽之戰」,「香港芫荽黨」同「香港反芫荽黨」兩幫人馬日日為咗芫荽味道拗到面紅耳赤,終極問題係:「芫荽係香定係臭?」要解答呢個問題,先睇下芫荽係乜。

芫荽分佈全球

芫荽,又稱為芫茜,廣東以外叫香菜,學名 Coriandrum sativum,屬一年生草本植物,全球各地都有發現,於多個地方成為烹飪常用香科,包括中東菜、中南美州菜式、東亞菜 (特別是越南菜、泰國菜)、印度菜、中國菜等。芫荽令食物更添風味,亦可以辟除海鮮腥味及動物內臟騷臭味。

本地芫荽產品
本地芫荽產品

近年,芫荽在日本飲食界大行其道,由飲品至甜品都廣泛使用,台灣及香港亦相繼流行。

芫荽香氣除咗為食物增添獨特味道,亦有助殺死有害細菌。呢個歸功於芫荽裏面嘅醛類 (aldehydes)。研究發現,呢種物質具有抑制大腸桿菌、枯草桿菌、金黃色葡萄球菌嘅生長,令食物保存得更耐。

臭定唔臭? 聞得到先叫臭!

芫荽臭定唔臭,呢個爭論爭持咗幾十以至幾百年,近年隨住科技發展,問題先得到解決。

日本有芫荽浴

基因決定論

流傳最廣泛及最具說服力嘅研究,係2012年由 Nicholas Eriksson 主導嘅研究項目。Eriksson 搵咗14604名參與者進行調查,結果發現接近14% (即2000人左右) 覺得芫荽有陣番梘味,離遠聞到都要掉頭走。

經佢哋以基因分析,發現覺得芫荽臭嘅人,普遍都因為一組叫「OR6A2」嘅「嗅覺受器基因」與其他人唔同,對芫荽嘅醛類出現異常反應,因而覺得芫荽有陣番梘味。

亦即係話,芫荽本身並唔臭,臭定唔臭,由人類基因決定。

芫荽沙律

種族決定論

與 Nicholas Eriksson 同一時期,加拿大另一個研究就以種族嘅方向去研究人類對芫荽嘅反應。佢哋發現討厭芫荽嘅民族,最大多數係東亞裔:

  • 東亞裔 21%
  • 高加索裔 17%
  • 非洲裔 14%
  • 南亞裔 7%
  • 西班牙裔 4%
  • 中東裔 3%

研究話因為中東人同西班牙嘅家鄉菜都會加入芫荽,所以佢哋唔會討厭呢種食物。不過,呢個講法被唔少人所反駁,因為東亞國家裏面,越南菜同泰國菜都有使用大量芫荽,研究自然不攻自破。

芫荽種子

習慣決定論

亦有行為學家認為,鍾意或唔鍾意一種食物,其實同個人飲食經驗有關。以芫荽為例,如果最初嘗試時為你帶來歡愉、開心嘅情緒,下一次食嘅時候唔會抗拒。相反,如果身邊嘅人不斷話芫荽臭,亦有可能會令你討厭咗佢。

所以,講嚟講去,芫荽臭唔臭未必係重點,最重要係大家用咩方法,接受人人唔同嘅口味。

資料: 泛科學


文章為作者意見,不代表Fitz立場。