繼2018年開徵糖稅 (Sugar Tax) 後，英國政府研究向含糖及含鹽嘅零食徵收稅項，稱為「零食稅」(snack tax)，以促使國民食少啲零食，減少肥胖問題。英國每年平均有64,000人，因癡肥併發症離世，2020年亦有調查指出，英國人平均脂肪率為28%，比送去屠房嘅養殖豬隻16%嘅脂肪率更高。
(按: 成年男性脂肪率20%以上，女性27%以上，皆被視為肥胖)
英國食品政策 (National Food Strategy) 的獨立審查建議，將包括每公斤砂糖徵收3英鎊 (約32.2港元)，每公斤鹽徵收6英鎊 (約64.5港元)，每個4人家庭每年大約要繳稅240英鎊 (約2500港幣)。收到嘅稅項用以支持國民保健署 (NHS) 為肥胖人士烹調健康食物之用，亦可改善貧困國民及學校嘅飲食及教育。
大部份疑受影響企業，對呢個計劃深表不滿。農業團體擔心會「誤中副車」，打擊乾果、果醬等健康食品市場。有團體亦話政府搞分化，因為「零食稅」並無規管鮮肉食品，而部份肉類亦會導致人體肥胖。
糖稅尚未成功
2018年英國政府推行「糖稅」(Sugar Tax)，向含糖飲料、糖果等食品徵收附加稅。政策推行以來，市面上飲料嘅糖含量平均下降28.8%，含糖飲料銷量雖有下跌，但係食品商為求避稅，推出更多低糖飲品，令低糖飲料銷售大幅上升，國民整體攝取糖份並無明顯減少，肥胖問題仍然存在。
所以，「零食稅」係咪真係可以改善國民健康，就更令人懷疑。
資料: 每日郵報、New York Times、The Times
講求綠色、環保、天然的健康生活。推廣新一代健康生活文化。
