香港人鍾意食沙爹牛肉麵，鍾意到要成立香港沙爹牛肉麵關注組，甚至有人話食上癮要每日啪返碗。不過，好食嘅嘢大多邪惡，沙爹牛麵食得多都有損健康。
沙爹牛肉極邪惡
以港式早餐來講，沙爹牛面同餐蛋麵叮噹馬頭，都屬邪惡食物榜頭兩位。按道理，沙爹牛肉並非加工食物，會比以高鈉高脂肪聞名嘅午餐肉有益健康。不過，沙爹牛肉麵嘅原材料同製作過程，同樣對健康有害，多食不宜。(熱量含量以每碗沙爹牛麵計)
牛肉 (約200千卡)
牛肉比其他肉類含有更多脂肪。每100克牛肉，含有約20克脂肪，當中包括7.8克反式脂肪。而茶餐聽嘅沙爹牛肉，會加入鹽、糖，甚至係食用梳打，以增加牛肉風味同口感。
沙爹醬 (約100千卡)
港式沙爹醬成份為花生、鹽、花生醬、辣椒等，而烹煮過程必須要加入大量油，以令佢更香口。所以，沙爹配埋牛肉，就令脂肪含量更多。而且越好味嘅沙爹醬，即代表越多花生或花生醬，花生油份驚人，脂肪亦多。
即食麵 (約400千卡)
即食麵係居家旅行邪惡食物嘅大佬級人馬，呢種以麵粉製作嘅油炸食物，含有超高熱量及脂肪。而加入嘅調味粉又有高含量嘅鹽、糖及增味劑。
1200千卡早餐要跑幾耐?
計一計，一碗茶記沙爹牛麵大概有700至800千卡路里，連埋其他食品同飲品，一份早餐B (早餐A通常係火腿通) 嘅熱量大概係:
- 沙爹牛肉麵: 700千卡
- 火腿奄列: 168千卡
- 牛油方包: 264千卡
- 絲襪奶茶: 120千卡 (走糖少20千卡)
早餐B (沙爹牛肉麵) 總熱量: 1252千卡
1200千卡一份餐，熱量同一碟乾沙牛河相若，大家以後仲敢唔敢日日食?
資料: My Fitness Pal、Topick、衛生防護中心熱量知多少
講求綠色、環保、天然的健康生活。推廣新一代健康生活文化。
