Fitz > 飲食 Diet > [高科技減肥] 植入晶片控制飲食

利用外科手術,例如抽脂、扎胃,以減肥目的嘅醫療手段,已經唔係新鮮事。

近年,隨著人工晶片發展更迅速 (包括鋰電池壽命更長),喺人體注入晶片以治療慢性疾病亦日漸普遍。最近,終於有人嘗試利用人工晶片用以減肥,仲取得了初步成果。

美國有醫療科技公司近年開發一套大腦神經系統晶片,稱為 RNS (Responsive Neurostimulation System),原先嘅目的係治療吸毒、酗酒、吸煙等成癮疾病。科學家發現,每當病患者開始「吊癮」時,大腦會出現局部癲癇情況。呢個時候,人工晶片會以電擊制止癲癇,減輕病患者上癮嘅情況,最後甚至戒絕惡習。

RNS (Responsive Neurostimulation System)

後來,有關研究團隊擴大測試範圍,將晶片用以減輕部份癡肥病患者對飲食嘅倚賴,從而令佢哋可以輕鬆減肥。佢哋將晶片植入白老鼠身上去控制老鼠嘅進食次數及份量,發覺效果良好。佢地估計,只要將晶片植入人體18個月,就足以改變一個人嘅飲食習慣,食得健康。

有關科研公司聲稱五年後有關晶片可在人體植物,目標係一啲扎胃手術失敗嘅癡肥病患者。不過諗深層,用晶片去改變一個人嘅生活習慣,究竟係咪合乎道德呢? 呢次晶片改變你嘅飲食習慣,下次會唔會改變埋你嘅投票取向? 筆者對於科技只係識條鐵,只係越諗越驚……

資料來源: 英國《每日電訊報》

Fitz連結: https://fitz.hk/?p=124310


文章為作者意見,不代表Fitz立場。
歡迎投稿: https://fitz.hk/contribute/