Fitz > 飲食 Diet > [70/30 減重法則] 運動 飲食 缺一不可 另加10分智商

網上流傳一則討論區截圖,一名太太 (有個仔自己識買雪糕) 減肥失敗嘅經歷。

太太嘅問題大致係咁:

  • 一星期做三次運動,每次1小時
  • 間中會「狂食」零食,仲成日食雪糕 (因為阿仔會買返屋企)
  • 運動維持咗一個月,不過一磅都無減到,仲越來越重

網民反應

太太嘅失敗經歷引來網民激烈討論,其實大家心水都好清:

  • 3分運動,7分飲食,10分智商
  • 如果運動量係夠嘅,唔節食都會瘦
  • 日日清淡,但完全冇講份量,如果你日日三大碗白碗都好難唔肥
  • 日日做咩運動先?日日 Burpee 一個鐘先啦
  • 體重已經直接反映佢 input > output
  • 飲食重要過運動
  • 佢都係想人答佢「係呀冇用㗎」然後大條道理放棄啫
  • 要好似琦玉老師咁先得架
崎玉老師

70/30 rule

有網民提出「3分運動,7分飲食」呢個概念,事實上係大多數減重計劃所採用嘅不二法門。有健身教練甚至有名言: 「腹肌喺廚房練而唔係喺健身室練」。

提出「70/30 法則」嘅朋友相信,減重關鍵在於提升身體燃燒嘅熱量 (靠做運動),以及減少身體吸收熱量 (靠飲食),兩大步驟,缺一不可。不少研究亦表明,唔改變飲食習慣之下做運動,會鍛鍊比脂肪更密集嘅肌肉,無助減輕體重。

此外,想用運動去減重,亦要注意運動嘅時間同強度。運動最初嘅30至40分鐘,身體會燃燒熱量及脂肪。大約40分鐘之後,肌肉群開始變熱,會大量出汗,加速脂肪減耗。流汗越多,減肥越多。(注意: 做運動汗流同焗桑拿流汗好唔同。) 所以,做運動唔可以少過30分鐘,亦要有番咁上下強度,令身體可以流汗。

改變生活習慣先係皇道

其實無論係咪相信 70/30 rule,減重終極原則都係將壞習慣改變,重新建立健康新生活。要減重,要做嘅第一件事未必係買波鞋或者丟棄垃圾食物,而係鼓起勇氣去迎接新生活。當有決心去改變生活習慣,你自自然然就會每日做運動,亦會避開雪櫃一盒一盒嘅高脂雪糕。

資料: Insta Fitness


文章為作者意見,不代表Fitz立場。