中年，兩個字，啱啱十劃，可以有數不盡嘅同義詞！
中年係 “危機”，中年係”發福”，係”困惑”，係”壓力”，中年亦可以係”機遇”，可以係”抉擇”，中年可以係”希望” ……
但，中年亦可以係 “挑戰”，可以係”轉變” 。
近年日網上有人將 Marathon、Triathlon 同 HYROX 稱為 “中年三寶”，語氣通常帶點譏諷，彷彿一班四五十歲嘅人，突然凌晨五點起身跑步、星期六踩五個鐘單車、無端端研究 Zone 2 Heart Rate，甚至肯俾錢去推雪橇、Burpees、Farmers Carry 折磨自己，只不過係唔甘心老，想喺下垂嘅新陳代謝同逐漸模糊嘅人生定位之中，重新刷一次存在感。
某程度上，呢句其實冇錯。因為人到中年確實會明白，人生原來唔係線性上升，而係一場靜靜地向下嘅自我保衛戰。二十幾歲時熬夜兩晚照樣返工；三十歲開始，唔夠瞓個腦會 hang 機；四十歲後，你第一次發現，原來膝頭會同天氣同步，體能唔再係理所當然，甚至連專注力、記憶力、荷爾蒙、睡眠質素，都會開始一樣一樣向你投訴。於是，有人選擇認命，有人選擇養生，有人選擇醫美，而有另一班人，選擇去跑一場42.195公里，或者用十幾個鐘去完成一場 Full Ironman 鐵人賽，彷彿想用汗水同乳酸，向自己證明：I’m not done yet !
有趣嘅係，社會對中年人嘅要求，其實非常矛盾。你如果完全放棄身材管理，日日啤酒燒味宵夜，大家會拍拍你膊頭話：” 算啦，呢個年紀係咁㗎啦。” 但當你突然開始戒糖、跑步、健身、研究補給同恢復，甚至練到有腹肌，大家又會冷笑：” 嘩，中年危機呀？” 好似一個中年人，最好嘅狀態，就應該係半死不活，唔好太頹，但亦唔好太努力；唔好完全放棄自己，但更加唔好突然發光。因為一個仍然有企圖心、有紀律感、甚至仲對自己有要求嘅中年人，往往會令身邊好多人唔舒服。佢提醒咗別人：原來年紀大，未必一定要向生活投降。
其實所謂 “中年三寶” ，真正令人反感嘅，從來唔係運動本身，而係嗰種” 我仲想進步 “ 嘅氣味。因為當一個人開始認真跑步、認真訓練、認真飲食，某程度上等於承認咗自己仲相信改變。呢種相信，喺今日反而奢侈。好多人未到四十歲，靈魂已經提早退休，每日靠短視頻、八卦、股票升跌同情緒消費去填補空洞；相反，一班俾人笑係 “ 中年三寶” 嘅人，卻仲願意凌晨摸黑出門，願意一次又一次喺訓練入面面對自己嘅軟弱、退步、傷患同失敗。佢哋未必真係想贏人，但至少唔想輸俾昨日個自己。、
所以我愈諗愈覺得，” 中年三寶 “ 其實係一個幾浪漫嘅稱呼。因為到咗呢個年紀，仲肯去挑戰身體、管理意志、維持熱血，本身已經唔係關於運動，而係關於你仲願唔願意燃燒。真正可怕嘅，從來唔係一個中年人著住壓力襪衝終點，而係有啲人，明明仲未老，卻已經提早放棄咗對生命嘅渴望。
