最近 Polar 動作頻頻，繼早前推出無屏幕的健康追蹤器 Polar Loop，最近又發佈了全新智能運動手錶 Polar Street X。單睇名字已經感覺到，Polar 今次不是只想穩守專業領域，而係嘗試將產品線擴展向更廣闊的城市運動、健身愛好者及年輕一族。不過，實際效果又如何?
Polar Street X: 游走城市與戶外之間
根據 Polar 官方資料，Street X 定位是「城市與戶外的完美結合」，主打年輕、活力及多功能。有不少外國媒體，都將其形容為健身室常客「恩物」。Street X 亮點在於極具競爭力定價，加上 Polar 專業運動數據與睡眠追蹤系統，以 $2,000 有找的定價 ($1950) 可說是非常吸引。外觀設計上，Street X 基本配有「夜黑」及「雪白」兩種顏色，4月份最新推出的「軍綠色」，多了一份與戶外山系風格，適合運動時佩戴，日常穿搭亦方便。
最大賣點: 性價比高
價格親民，但 Street X 功能上仍然交足功課，基本上保留了 Polar 核心功能及配置，如 AMOLED 觸控屏幕 (1.28 吋 Gorilla Glass 3.0)、內置 GPS 、指南針、路線導航、氣壓計等。配合 Polar Flow App 使用，總共有170個運動模式 (Sports Profiles) 可供選擇，而 Polar 首次於手錶加入的 LED 白光與紅光雙模式手電筒，亦係城市生活以至戶外鍛鍊非常實用之功能。
Street X 在智能手錶模式下，續航力最長可達10天，而在 GPS 訓練模式下，可連續運作長達43小時，基本上能滿足大部份需求。
保護性強/防水
平價不一定「化學」，Street X 錶身採用強化聚合物，通過 MIL-STD -810H 軍規級耐用測試，以及具備 WR50 防水級別 (深度達50米)，日常運動、雨中跑步，甚至是週末行山或越野跑都游刃有餘。實測時戴著 Street X 進行戶外鍛鍊，不小心刮到樹枝或石塊，錶身依然絲毫無損，「粗用」絕對無問題。Sport Profiles 支援游泳、滑浪、直立板等運動，適合熱愛水上活動嘅朋友。
170種運動模式
運動模式方面，Street X 基本上涵蓋了170個運動，除了常規的跑步、單車，連近年非常流行的 Functional Training (功能性訓練)、HIIT 等高強度室內運動都一應俱全。不過大家要留意，初次使用時需要先在手機的 Polar Flow App 內，你將心水的運動模式同步加入手錶才可使用。
Street X 同時保留了「多項運動」 “Multisport” 模式，用家可以喺不中斷記錄的情況下，轉換另一種運動，對於喜歡二鐵、三鐵的朋友來說，Multisport 模式非常有用。不過轉換過程需要時間熟習，學會了會變得簡單。
內置電筒 Flashlight
以往較少喺戶外錶款見到的內置電筒功能，今次 Polar 首度於 Street X 亮相。除了大家意想得到嘅戶外照明等用途，日常生活中最常用到的情境，應該係「喺梳化或者枱底執嘢」(笑)。說回認真，若果行山入黑，或者喺緊急情況下需要照明及發出求救閃燈訊號，手錶上光源絕對能夠發揮救命作用。
錶面細細加輕身反成優勢
Street X 重量只有 48g，加上錶面設計較為小巧 (1.28 吋)，上手感覺非常輕盈，坦白講對於戴開大錶面嘅人士，初上手會感到不習慣。不過，當你喺 Gym room 舉鐵、做掌上壓或 Burpees 時，手腕大幅度屈曲亦不會覺得有硬物頂住，減輕了訓練時的負累。而輕巧另一好處，就你睡覺時也幾乎「無感」，不是沒有感覺，但 48g 的重量不會令你覺得不自在，願意長時間佩戴，甚至成為生活一部份，從而獲得更連貫、準確的睡眠分析及 Nightly Recharge 恢復數據。
GPS 路線導航，戶外運動都適合
雖然整體設計偏向城市運動及健身，但 Polar 並無「閹割」戶外靈魂。Street X 依然內置精準 GPS 系統，並且支援路線導航功能。只要預先透過 Polar Flow App 以 .gpx 或 .tcx 檔案形式匯入 Street X，或者透過綁定 Strava、Komoot 賬戶同步路線，手錶螢幕上會顯示指引帶路，同時可以顯示路線尚餘距離。
Street X 適合哪類人士?
如果你係:
- 剛開始培養運動習慣的入門人士
- 喜歡做 Gym、Functional Training 或 HIIT 的健身愛好者
- 週末間中會去行山、跑步，需要基本 GPS 導航
- 預算不多 (HK$2,000 以下），但又想有大品牌專業支援的運動手錶
Street X 會係你心水之選。以 HK$1,950 定價，坊間要找到同級產品相對困難，有興趣不妨一試。
