有睇過《陸王》嗎? 這套日劇 (或者是原著小說)，講的是百年足袋生產商「小鉤屋」，在時代巨輪下掙扎求存的故事: 到底要墨守成規，守住步向黃昏的足袋本業，還是要投放資源開發新赤足跑鞋，嘗試殺出新血路?
最近小編有幸獲得香港代理 Above the Clouds 邀請，親身訪問 Topo 創辦人 Tony Post。Tony 有幾傳奇? 佢喺鞋業打滾40年，做過 Vibram USA 嘅 President 兼 CEO，五指鞋 (Five Fingers) 由佢發揚光大；2012年忽然學人裸辭，翌年宣布成立自家品牌 Topo Athletic，誓要「自己跑鞋自己做」。
當時 Tony 已經55歲。
與跑鞋結緣
講 Topo 前，要先講講 Tony Post 嘅前半生: 喺美國科羅拉多州長大嘅佢，大學一年級先至接觸跑步，受訓後第二年就連奪兩個校際獎項，信心大增。畢業後想跑得更快更遠，試過一星期操足13課，一周里數超過100英里係等閒事，但係伴隨嘅就係傷患同痛楚，所以 Tony 同時間開始研究跑鞋，除咗想「跑得更快」，仲想「操得更多」。
1984年，Tony 加入皮鞋品牌 Rockport ，由客服做起，一年後轉到產品開發部。熟悉 Rockport 嘅朋友或者知道，佢哋本身鞋款平平無奇，但著起就非常舒服。1990年已成為副總裁嘅 Tony，著住 Rockport 皮鞋完成紐約馬拉松 (下圖)，兩年後更著住皮鞋用2小時49分跑完芝加哥馬拉松，就算到而家仍被用作生招牌。
透過 Rockport，Tony 認識了 Vibram 意大利總公司，2001年更獲對方邀請過檔成立 Vibram USA。
小編問: 「當時 Vibram USA 應該有好多資源?」
Tony:「開始時只得我同另外一人。」
就算係咁，都無阻 Tony 之後喺北美以至全球大賣特賣 Five Fingers。據 CNBC 報道，喺2006年至2010年間，Five Fingers 銷售額每年以三倍嘅速度遞增。除咗受惠於《Born To Run 天生就會跑》掀起嘅赤足熱潮，Tony Post 亦居功至偉，外媒一般都以 ”Man behind Five Fingers” 嚟形容佢。
現實版《陸王》
《陸王》入面，「小鉤屋」第四代社長宮澤紘一，喺百貨公司偶然見到五指鞋，啟發佢改良足袋變成「赤足跑鞋」。所謂「赤足跑鞋」其中一個特點，就係零落差設計 (Zero-Drop)，鞋踭同前掌厚度無分別，模仿平時赤足狀態。Tony 形容: 「Five Fingers 對我嚟講意義重大，因為佢令我第一次明白到，使用腳掌上所有肌肉嘅重要性。有足夠空間俾腳趾活動，唔單止舒適，更可以利用腳趾去平衡、轉向同控制速度等，非常重要。」
不過，五指鞋極度簡約嘅設計，換嚟就係保護性不足，而呢個亦係點解 Tony 年過半百，都要立起衫袖自己創立 Topo。
「我想將五指鞋嘅優點加以改良，製造一啲外型較易入口，保護性又高嘅跑鞋。」
小編:「即是 Topo 是根據 (based on) 五指鞋去設計?」
Tony 斬釘截鐵說:「evolve，進化。」
Tony 成立 Topo 後，頭三對推出嘅產品，都係參照日本足袋 (Tabi) 設計，拇趾與其餘四趾分開 (見上圖)，似足「小鉤屋」嘅足袋，但又有跑鞋嘅保護性同避震 (當然唔係厚底)。雖然呢個設計初時獲得好評，但銷售未如理想，最終要清貨兼停產。就連 Tony 後來都承認:「Topo 行得太快，消費者未接受到。」雖然上咗寶貴一課，不過呢次亦為佢哋打好根基，進一步改良設計。
喺今次訪問過程，Tony 反覆提及 Topo 生產跑鞋嘅三大原則，唔理用咩物料，都離唔開佢哋:
- 鞋頭闊: 腳趾有充足活動空間
- 鞋身窄: 緊貼中足，增強保護性
- 鞋踭實淨: 不會左搖右擺，加強穩定性
睇得出，以上三個元素係 Tony 自1984年入行，累積近40年得出嘅造鞋經驗，佢形容當時市面上，根本無 Topo 同類型嘅跑鞋，所以要自己造佢出嚟。另外值得一提嘅係，Tony 知道唔少跑者轉著 zero-drop 跑鞋時都遇到問題，所以 Topo 生產嘅都係低落差跑鞋 (low-drop)，每對鞋嘅鞋踭都有寫明幾多mm 落差，方便跑手適應同過渡。
「我唔希望 Topo 會被標籤，亦唔會盲目跟風。始終唔同人有唔同喜好，有人鍾意薄底有人鍾意厚底，所以我哋唔會只生產某一類型跑鞋，重要係我哋使用最好嘅物料，造出唔同款式俾唔同類型嘅用家。
例如，Topo 所有越野跑鞋都係採用 Vibram 鞋底，亦有採用 Ortholite 鞋墊，如果用款式去計，基本上無兩款 Topo 跑鞋提供完全相同嘅功能。」Tony Post 咁講。
十年
今年係 Topo Athletic 成立十周年，喺市場已有一定認受性，生產過程亦更趨科學化:「喺設計過程入面，我哋團隊會同足科矯型師同以及物理學者合作，尋求意見改良設計。」正因如此，Topo 唔少款式都獲得「美國足病醫學協會」(APMA, American Podiatric Medical Association) 嘅認證 (Seal of Acceptance)，能促進腳部健康。
問 Tony 點睇而家嘅「碳板」同「厚底」熱潮，佢話:「我喺呢個行頭已經夠長日子，見證過唔少高低起伏。有時你會覺得，要跟住大家一齊走先有出路，但又可能突然殺一個新產品，將所有趨勢改變。最重要係，我哋繼續做好自己，認清優點以及多聽顧客意見，咁樣 Topo 就可以一直走下去。」
後記
訪問過後，小編仍有未解之謎: 55歲創辦 Topo，真係只為「男人的浪漫」，要完成未完嘅事? 翻查報道，原來 Tony 當年創立 Topo，未賣出第一對鞋，已獲500萬美元A輪融資，足以證明 “Tony Post” 呢個名係幾咁值錢。
更令你估唔到嘅係，Topo 上年已獲美國上市嘅 Designer Brands 買入 Topo 79.4%股份，Tony 身家暴漲 (收購價上網搵到)。佢喺訪問期間亦有提到，Designer Brands 講明 Topo 繼續享有自主權，因為佢哋 CEO 本身每日都著住 Topo 跑步，所以好信任 Topo 嘅團隊同產品。
55歲先嚟創業嘅 Tony Post，再次獲得空前成功。小編仲記得臨走時問佢哋住邊間酒店，Tony 話係 Marriott，不過好似 “somewhere near Shatin” (即係石門嗰間)……連揀酒店都同 Topo 嘅鞋一樣咁實而不華，果然抵佢哋成功。
Topo 銷售點
Action Panda
蘋果園體育用品
Backpacker
Cam2 Sport
沙木尼登山用品
Free Jump and move
Free Running
Go Wild
Hillmalaya
Joyee Walker
Lantau Base Camp
Re:echo
玫瑰體育用品
Round The World優遊天下
Runderful
Sai Kung Base Camp
Sportimate
Trailblazer
允記
Wild Travel
作者: Eric
