幾個月前，叔叔嘅教練黃師傅失驚無神 發咗條 WhatsApp 俾我 ….
“ 喂，有無信心 HYROX HK 同我拍 Doubles Men，我帶你扯白旗。”
當其時叔叔已經攞咗兩次 Doubles Men 第二名 黑旗，但白旗? That’s another level of shit!
“ 超，既然你唔怕俾我拖慢無得威，我怕乜?”
如是者幾日前 HYROX HK ，被我教練拍檔 Push 到極限邊緣，跑到接近彌留狀態目光呆滯，Roxzone 做到全身脫力之後，我哋真係攞咗 AG 冠軍扯白旗，贏第二第三足足六分鐘有多，更因為頒獎時黃師傅賽緊 Relay ，叔叔可以抱住外孫女上台代領獎，此生此刻，永誌難忘。
但我想講嘅其實唔係齋得獎嘅喜悅，而係叔叔身為運動愛好者，一件資深廣告人 Marketer ，所睇到感受到 HYROX 運動經濟產業鏈嘅強勁。
HYROX 2017年喺德國 Hamburg 第一次舉辦時，只得650名參賽者。當時大家以為，唓，咪又係另一場一年熱、兩年凍嘅 Fitness Event，點估到短短幾年後，成件事火紅到核爆。
2024年，HYROX全球參賽人數已突破45萬；2025年更加升至超過65萬，橫跨超過30個國家、85個城市、80多場賽事。而最誇張係，HYROX 內部預測，2026年全球參與人數將突破130萬。
130萬人係乜概念？
即係已經接近一個中型城市人口，例如澳洲嘅 Adelaide，泰國嘅清邁，而且，呢130萬人，全部都願意主動俾錢去受苦，問你服未?
以前，跑馬拉松已經叫 “ 運動經濟 “
但 HYROX，其實係另一個 Level。因為馬拉松主要消費，集中喺跑鞋同賽事，而 HYROX 則直接養活成條 Fitness Supply Chain。
根據市場統計，HYROX 相關產業消費，平均每位參賽者每年額外支出約200至400英鎊；高階玩家更加遠超呢個數字。因為HYROX玩家，已經唔再係普通運動愛好者。
鞋，要專項。
手套，要防滑。
訓練，要 Hybrid。
Recovery，要冰浴。
營養，要 Macro Tracking。
睡眠，要 Monitor。
心率，要精準。
連呼吸，都開始有人請 Coach 教。
以前啲人要型買勞力士。
今日啲人要型買 Garmin Watch 加 Recovery Boots。
以前講 Vintage Wine。
今日講 VO2Max。
而最緊要係係，HYROX仲生成咗一種全球旅遊模式。
根據統計，HYROX 賽事平均有30%至40%參賽者屬於外地旅客；部分熱門城市甚至超過一半。
即係咩？即係愈來愈多人，去旅行唔係為放鬆。而係為咗折磨自己。
東京、倫敦、芝加哥、新加坡、香港、澳洲 、中國，一班人拖住行李箱飛去世界各地，唔係 Shopping。
係去做Burpee，拉滑雪機，推雪橇，划船機，推药球等等。
新加坡 HYROX，單係海外參賽者已超過2200人；而當地酒店業開始推出 Recovery Package、高蛋白餐單、冰浴服務同延遲退房，務求你哋食年玩完，下年唔捨得唔嚟，仲要一早預定。
以前五星級酒店賣海景。
今日開始賣 Cold Plunge。
以前旅遊局吸引人靠夜景。
今日可能靠 Fitness Event。
而 HYROX 最恐怖嘅地方，係佢唔只帶動消費。佢仲改變緊某類人對 “ 身份 “嘅定義。
以前，中產炫耀財富。
今日，中產炫耀紀律。
以前成功人士戴 Rolex。
今日成功人士戴 Garmin。
以前人講自己飲咩 Whisky。
今日講自己點 Keep Zone 2。
成個社會，由 “ Luxury Consumption “，慢慢演化成 “ Luxury Discipline “ 。
你愈肯虐待自己，同溫層愈尊重你。
而 HYROX，正正係將呢種心理精準商品化。
而家乃係 AI、Filter、短片文化充斥嘅年代，現代人最缺乏嘅，其實唔係娛樂。而係真實感。
你開 Zoom Meeting，唔會感受到自己活著。你覆 Email，靈魂唔會震動。你 Scroll Reels 兩個鐘，只會愈睇愈空虛。
但當你推 Sled Push 推到雙腳發軟；當你 Rowing 做到肺部爆炸；當 你Wall Ball做 到眼前發黑，你會突然感受到一件好原始嘅事: 原來我仲控制到自己，仲可以不斷強化向前，做到我一 直以為自己做唔到嘅嘢 ！呢種感覺，好上癮。所以HYROX 根本唔係單純一場Fitness Race，而係龐大商機。
HYROX 係一個大型都市人精神出口。大家排隊俾錢受苦，並唔係因為鍾意痛，而係因為喺呢個太舒服、太方便、太虛擬嘅世界，只有痛苦，仲係真。俾錢去玩去做，定全無問題何樂而不為？
根據近年資料估計 ，HYROX 2026 Revenue Projection 超過 US$ 220M ，即係HK$ 1,722M。全球 Affiliate gym 已超過 5000 間 。
根本就係商業奇才加極高執行力嘅成果，好肯定好快寫入大學教科書案例，而呢條案例，你同我都好有可能會貢獻其中。
