相信唔少Fitz嘅讀者，都用過Strava呢個手機運動App。成日話而家係大數據時代（Big Data），Strava儲落咁多資料，令佢哋輕易就了解到全球運動者嘅習慣，原來佢哋亦有「回饋」用戶，公開返部份數據俾大家睇，非常值得參考。
Strava嘅Global Heatmap，集齊全球用戶由2014年1月起，超過1.4億次運動紀錄，將佢哋放晒落去Google Map，俾大家自由放大縮細之餘，再以顏色顯示邊條路線最hit（可揀睇Run、Bike或者Both）。如果大家喺地圖上去到香港（上圖），會發現唔少熱門路線都喺香港島，再放大一啲，就可以睇到唔少細節：
郵輪碼頭、將軍澳同港島東海傍，都有唔少人練跑，反而觀塘海濱公園竟然較少人；
喺港島，識得跑一定跑寶雲道（下圖中間偏右），之後最受歡迎嘅，應該係堅尼地城跑入數碼港；
咁踩單車又點呢？下面兩幅大嶼山heatmap，上面嗰幅好明顯睇到，車友好鍾意踩嘅東涌至廸欣湖路線，相反再下面嘅，就見到唔少跑友行山友都有開住Strava行鳳鳳徑；
跳出香港又如何？中國只有零星熱門路線，相信係同較少人用Strava有關，台灣就梗係唔使講，非常多熱點啦（台東就差啲啲）;
美國嘅東岸明顯多人跑步過西岸，唔知係咪同全球六大馬拉松，有兩個都喺嗰頭搞有關呢？（紐約馬拉松、波士頓馬拉松）；
睇埋歐洲，嘩，幾乎成個英國都有做運動，真係有啲恐怖！
小編覺得Strava呢個Global Heatmap，最有用就係當你去到外地旅行，好容易就搵到當地嘅熱門運動路線，當然喺香港嘅話，大家都可以用佢嚟度下畫個咩圈好，總之好有用啦！
----- 廣告 Ad -----
更多：
一生起碼瘋一次
人肉繪圖師
Fitz Gear 裝備
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。