2015/6/7 係我一生都會記得、圓夢嘅重要日子 – 跑個100K。

跑完後, 經過兩星期嘅沉澱先可以寫到感想。

因為小弟隻跑錶捱唔到過7粒鐘,只能同步用電話apps計距離。用Apps 計算就116K,但我在http://www.gmap-pedometer.com/ 畫路線時就只有109K。不過唔理了…過左100K 就得啦!!

呢次咁瘋癲嘅行為,其實早幾年已經有FF 過, 毒害我嘅元兇係我呢世未必見到佢 – 村上春樹!

我第一本睇佢嘅書係《關於跑步,我說的其實是…》 見佢講用11個零鐘跑完100K,衝線果下個款好似去地盤擔完泥咁,覺得佢唔係撞親個腦就係應該神經有問題,跑咁長為乜? 不過,最神經有問題嘅係…我竟然想試一次…因為人生真係型得一次得一次…

當時我仲係跑緊半馬,都有D痴人說夢話。一生起碼瘋一次_01學佢話齋:

「痛是在所難免,苦卻是甘願」

我在一個半月內由 43K > 51K > 60K >72.5K > 116K,每一次超長距離嘅最後10K ,心中都會有把聲同我講「你玩夠未呀? 比我抖下得唔得?」而對腳已經同假腳冇分別。

但心想跑到百零K呢個位,冇理由唔畫埋個圈,瞓住跑都要爬返到起點。而且,最後10K 仲有一包POWER GEL喺身,試問我唔食埋佢點對得住包GEL?

由農夫插秧嘅時間,跑到連貓頭鷹都訓埋,中間大部份時間都烈陽下做魯賓遜 (好似32度),約20多個鐘,第二日仲要晨咁早返公司,我真係食矇左。

最後返到馬鞍山海濱長廊,真係大叫左聲「我終於返到啦!」,因為我實在太眼瞓了。一生起碼瘋一次_02能夠完成今次痴人說夢係靠三個心念:

  1. 其實唔難 (very basic and simple)
  2. 太易跑了
  3. 完成係必然,唔係咁易都做唔到呀?

心態往往可以戰勝身體上嘅耐力,從一開始計劃條路線,冇諗過會跑唔到,只係擔心我趕唔趕得切返屋企瞓覺。

只要慢慢跑,完成只係時間嘅問題。

每一個跑者,都有自己跑嘅原因。而我亦不例外,仲要係某日跑跑下叮一聲先知自己為乜要跑。

我愛跑長途,因為慢跑是我最安靜、最能夠清理自己心靈最佳嘅時間。

有人用打坐,禪修,畫萬陀羅,玩天使卡等方法做冥想。而跑步暫時對我黎講係最能令我清空自己,讓靈感進入嘅靜心活動。

以前跑步,只會一味想快、快、快,但往往只顧住快而忽略左自己心靈健康。

所以處理其他事情上,直接反映出性格,只會性急,冇耐性,容易燥底 ,好似隨時提早更年期咁。

自從慢跑左,放下追時間嘅執著,以上「病發」嘅機會已經大大減少,人嘅性情變得溫和更多。

經過今次興奮遠征,發覺做任何事情、面對任何困難都唔係一個問題。只要你諗自己得,就一定得。

重點係你對每件事嘅態度,因為最大嘅敵人永遠都係自己。

(但似乎世界已經阻止唔到自己繼續痴落去…)

任何一個夢想除左自己嘅堅持,旁人鼓勵都係其中重要嘅一環, 畢竟人不是能獨自一個活下去的生物。

我能圓夢必定要多謝一位好重要的摰友,因為佢都係癲、任何要做嘅事情都非常堅持、有唔放棄嘅精神。係佢不斷鼓勵、支持、給我信心先可以完成。嘅然別人都對自己有信心,點解自己都信唔過自己呢? 自己對自己有信心先可以完成任何一件事。

以表謝意我請左佢食一餐飯…就係佢最愛嘅咖喱牛腩飯 + 凍檸茶!!

另外仲要多謝尖沙咀碼頭嘅日本結他手,當時見到佢唱緊唔知咩歌,見佢唱得咁激昂就決定比埋身上果20個大洋佢,等自己咩後路都冇, 用我D CHINESE ENGLISH同佢講我就黎圓我人生其中一個夢想,叫佢彈隻熱血少少嘅歌黎振奮下我。

點知佢彈左一首雖然係好熱血但我又唔識嘅歌…我自己仲要跟住個Beat郁…

我應該叫佢彈首 “勇者王” 仲夠熱血…不過都冇問題,上晒電就跑埋淨低果21K

做所有事情,只有為與不為、肯同唔肯、認真同唔唔認真。

不要為害怕而卻步,那怕只係果一小步,已經係今日嘅我打倒昨日嘅我

人生 – 就好似一盒朱古力咁,你永遠唔知下一粒係苦過 De De ,定係甜過小甜甜。

人生 – 短暫,有些事現在不做一輩子都不會做了。

人生 – 精彩不亮麗,起落是無常。

最後。。我要多謝我對席席Bird 光管腳。。容許我不斷強暴佢走咁遠,第二日仲正常行到路冇攰,非常感恩!

是次痴線路線:

馬鞍山海濱>西貢>將軍澳>油塘>鯉景灣>小西灣>大浪灣>大譚>赤柱>黃竹坑>香港仔>貝沙灣>數碼港>西環>上環>中環>尖沙咀>旺角>太子>大埔道>大圍>沙田>馬鞍山海濱

到我跑完,先知道係一隻鷹。

一生起碼瘋一次_04更多:
夏天瘋狂的事
人肉繪圖師
Fitz Running 跑步


文章為作者意見,不代表Fitz立場。

歡迎投稿: http://fitz.hk/contribute/

沙灘
今年渣打全馬,又流血又抽筋,決心來年要輕鬆完賽。從練習超長距離慢跑中,發覺可以清洗心靈,進行靜心,尋找自我,令自己常處於平靜狀態,活在當下。