意大利Vibram最新公布嘅Vibram Furoshiki系列，很肯定啱晒你對腳！
點解咁講？Furoshiki，解日本嘅風呂敷，即係喺江戶時代日本人，用嚟攜帶物品去澡堂嗰個包袱，到咗今時今日，亦有好多人會用嚟包住便當、書本出街。日本設計師橋本昌也（Masaya Hashimoto）受到「風呂敷」概念啟發，設計出Vibram Furoshiki呢款「包袱鞋」，特色係無鞋帶，只要將腳放入鞋內，然後用鞋面嘅布包住隻腳，最後用魔術貼黏埋就得，真正適合任何腳型。
問橋本昌也點解會有呢個設計概念，佢就話以手袋為例，西方設計一般都有固定形狀，大家要諗辦法將要帶嘅嘢fit入個袋；但係日本嘅「風呂敷」正正就調返轉，佢會根據你嘅物件而改變形狀。咁既然手袋做到，點解運動鞋唔得？結果佢就設計咗Vibram Furoshiki喇。
出晒名做五趾鞋嘅Vibram，今次係咪揾到另一隻會生金蛋嘅雞，暫時仍然未知，而家Vibram Furoshiki只限日本發售，售價約 1,100 港元，多個款式可供選擇，相信唔使幾耐香港都會有得賣。
資料來源：Vibram官網、furoshiki-shoes.jp
----- 廣告 Ad -----
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。