筆者剛評測完 Neo Vista 3，緊接就有機會體驗 Wave Rider 30，今年係呢個系列嘅 30 週年；在日本作產品發佈會時，更集合了 30 代的照片及產品帶媒體走一次 Wave Rider 的演變。
作為 Mizuno 長青型號，品牌方話 Wave Rider 30 迎來歷代以來最徹底嘅改變，打破過去偏硬身嘅印象，轉為一款柔軟流暢嘅全面日常訓練鞋。
相片來源：FASHIONSNAP
Wave Rider 30 結構賣點
鞋款為日常訓練鞋，緩震係主軸，中底後踭垂直厚度為 42.5mm (drop 為 8mm)。中底物料同係兩層設計，上層係注入氮氣嘅 ENERZY NXT (EVA) 泡棉，加強回彈，下層維持傳統 EVA，提供支撐性能，同時鞋底中足位置加闊 14mm，後踭亦加闊 4mm，增加穩定性。以往 Wave 波浪片只放係中後踭位置，今代改為全腳掌 Wave 波浪片，讓腳掌從落地到推蹬嘅過渡更流暢。鞋底落腳位置亦有加橡膠，前掌位置加深鞋底坑紋，提升抓地力同耐用性。鞋底加闊後，單腳重量只維持係 264g (27cm/US9)，同上次測試嘅 Neo Vista 3 相若，訓練鞋算輕身。
鞋面採用工程網布，針織網眼鞋面上透氣孔清晰可見，有助透氣。鞋舌與鞋身相連，可減少鞋面因跑步動作滑移。 鞋舌同鞋領位置用上傳統 padding 設計，提高包覆感，穿著感覺舒適，係訓練鞋嘅基本配備。腳跟及鞋舌位置一樣加入拉環，方便穿脫。
跑後感
久未著上 Wave Rider 系列，收到時攞上手，按一下中底感覺柔軟，以為會類似大部分日常訓練鞋，會出現「踩屎感」。著上踩落地後立即改觀，柔軟不是全部，受惠於全掌 Wave 波浪片，柔韌先係最好嘅形容。筆者暫只試用於 easy 及 long run 上，總計超過 70km。長課 90 分鐘可以充份感受到中底結構提供嘅穩定，腳掌落地後亦會順著 rocker effect 自然向前 roll，跑落非常慳力，即使長課後半程身體疲勞、跑姿走樣時，它依然能提供極佳支撐。若訓練有輕快跑嘅部分，如 6:00/km 開始，提速至 5:00/km 亦可勉強支持，但若要更快，或會反應不足，需要更大力量去推動。
總結
厚底鞋依然為現今大趨勢，但過去厚底鞋伴隨住過份柔軟嘅中底，雖然日常穿著或會感覺舒服，但缺乏韌性，尤其長距離訓練後期，身體疲勞時反讓雙腳更疲勞。Wave Rider 30 嘅柔韌正好讓跑者可以跑得耐、跑得穩，而非跑得快，唔會有被鞋「推著走」嘅被動感。鞋款適合啱啱入門嘅跑步新手，如果你正在備賽馬拉松，亦都可以考慮入手，作為日常輕鬆慢跑、LSD或恢復跑嘅「萬用練習鞋」。
定價：$990
尺寸：True to Size
廢跑 J
廢柴跑者，不學無術，運氣已在抽中 2019 年倫馬後耗盡，空餘時間希望可以支持香港運動員出一分力，畀更多人認識佢哋嘅努力