測試 On Cloudflow 4 速度練習鞋 | 後踭厚度增8mm輕身又靈活

上次介紹過 On 入面以緩震為賣點嘅 Cloudstratus 3，今次就介紹另一個鞋款: 輕量速度訓練款式: Cloudflow 4。從 2017 年開始推出第一代至今年第四代，Cloudflow 4 一直係 On 薄底鞋款，定位係 5K 到半馬嘅速度訓練同競速跑鞋。第四代最明顯改動，莫過於後踭厚度由第三代嘅 23mm 增加到 31mm 厚，前後掌落差為 8mm。

筆者今次測試呢款係同 Distance 聯乘版本，On 唔係呢度多介紹，反而簡單講吓 Distance。Distance 係一個創意運動團隊，以跑步為主題嘅運動選物商店，足跡已經由巴黎擴展去到里昂、哥本哈根，甚至係非洲肯亞，如果大家有留意，唔少大型品牌 (包括 Nike，asics 同 Oakley) 都有同佢做 event 或 crossover。Cloudflow 4 product launch 嘅時候，Distance 特意舉辦左一個室內接力賽，同時宣布 Distance Running Club 成立。呢次係 Distance 首次有鞋款聯乘，之前同 On 已經有推出一系列競賽衫褲。

Cloudflow 4 有以下值得留意

鞋面用咗 On 現時頂級碳板鞋 Cloudboom Echo 3 相同嘅梭織面料，更輕量更透氣；鞋內腳踭部分有額外加厚，令穿著更舒適同時加強穩定性。

中底用上標誌性 Cloudtec，物料一樣係 HelionTM Superfoam，但今次係一個三文治結構，上層偏軟，下層偏硬，中間夾住一塊 Speedboard，提供出色嘅緩震同回彈。中底嵌有上鏟式 Speedboard 膠板，提供向前推進腳感。

鞋底都係用咗 Cloudboom Echo 3 同一款外底物料，增強抓地力，外底亦已經封咗，鞋底係睇唔到 Speedboard

筆者已經著用跑左超過 80km，包括一課 10K Tempo，幾課運動場及跑馬地 interval，速度由 4:10/km 至 4:30/km 左右，極度推薦係運動場做速度訓練穿著。US8.5 重量都只係 235g，輕薄嘅鞋身加上 rocker effect 設計，大大提升跑者嘅觸地感及推動力，可以感受番薄底鞋練習嘅暢快感覺。如果要跑 Tempo，只要 pacing 可以維持 4分至 5 分內， Cloudflow 4 亦會非常適合。

總結

Cloudflow 4 鞋款定位以輕身靈活力作為賣點，適合對追求速度嘅跑者作強度衝刺練習。私心認為，如果 10K 能於 45 分鐘內完成嘅跑者會非常喜歡佢嘅設定，上層偏軟，下層偏硬嘅中底，提供適度緩震同時又有回彈；過去因為跑鞋市場發展，市場上唔會有太多呢類非碳板薄底練習鞋，但近年同類型嘅設定再次湧現，如 Hoka Mach 5，Nike Streakfly 或者 New Balance Fuelcell Rebel V3 等，證明更多人為左減低腳部負擔，開始 pick up 較薄底嘅鞋作相應練習。