好超然，好識呃「嬲」嘅香港特區首長話，佢有諗過喺中環海邊起個泳棚，等大家用15分鐘食完個Lunch，就可以用45分鐘游下水喎。佢幾體貼香港嘅小市民呀。(#曲線要講明)
其實都唔使搵嘅咩專家，一個六歲小朋友可以即刻答：「食飽游水會肚痛架！」呢啲咪common sense囉。
咁樣食飯法，又點去游水呢？不過喺辦公室，都可以咇啲時間做一啲簡單活動。
要lunch break過得健康，游水之外仲有好多選擇
1. 健身鍛練
唔係要做到身水身汗，好多Workout鍛練之餘，食飽飯都啱做。而最簡單嘅，就係做下深蹲，練下個Pat啦。
2. 散步
散步有益身心之餘，亦可以趁機了解你生活同工作嘅社區。
----- 廣告 Ad -----
3. 行樓梯
行樓梯係極之有益嘅帶氧運動，可鍛練心肺以及肌肉。跑友無時間落街走兩段，不妨衝去後樓梯跑番十零廿層，保證連澳景道都唔怕。
4. 煮飯
煮飯係一個好好嘅放鬆活動，如果office容許，咪煮餐簡單飯餸囉。唔得嘅話，整個三文治都OK呀。至少食材係自己揀，可以食得更健康。
唔係坐喺窗口就曬到太陽，唔該行兩步啦。
5. 曬太陽
太陽啱啱出嚟就要返工，OT到天黑先離開office，你見到太陽嘅時間，一日隨時唔會多過一粒鐘。趁食晏有時間，就落街曬太陽，吸收多啲維他命D啦。
6. 飲水/飲茶
據統計，大多數喺office工作嘅人，都忙於工作而唔記得飲水。咁就趁lunch break靜靜地飲番兩杯水。飲茶都得，不過盡量唔好飲汽水或甜嘢，好肥架。
----- 廣告 Ad -----
7. 閉目養神
食完飯無嘢做就放低手機，對少陣mon啦。可以索性合埋眼，甚至訓一陣。腦部休息其實對健康有正面幫助，因為壓力可導致肥胖，更會令身體變差。補充一下，早幾日德國工會提出要有午睡權，即係要喺午飯時間加設午睡時間。因為有研究話，午睡可以減少員工嘅患病率，並且提升工作效率。所以，大家有時間不妨瞓番陣。
8. 刷牙
牙齒乾淨人會精神啲，更令身體健康。
德國工會爭取緊午睡權
唉，我都明大家打工仔女喺lunch break都未必可以放低手機，甚至熄咗電腦，停止工作。總之，大家盡力做啦，至少都唔係叫話要去游水咁唔現實囉。（至於釣魚呢？乜劃個地區釣魚就保證有魚上釣？啲魚好似識游水喎。）
參考資料：PopSugar、The Guardian
更多:
Fitz.hk Facebook 專頁
午間散步—上環
午間散步—尖沙咀
午間散步—灣仔
[越坐越大鑊] 長期久坐14個隱患
Fitz Life 生活
