汽車同郊外其實格格不入。汽車製造空氣污染,製造嘈音,仲會阻路,如果唔係萬不得已,最好都唔好揸車去郊遊。有時明白到有人需要載小朋友、寵物去郊外玩,所以亦都無需二元對立,製造矛盾。不過,有時見到啲駕駛人士自私到爆,真係唔出聲都唔得。

1. 亂咁泊車

無論市區定係郊外,立亂泊車阻塞交通,同樣係黑人憎所為。當中最討厭就係啲人將車泊喺巴士站。一部巴士閒閒地載百幾人,你一部車阻住巴士出入,即係阻住至少百幾人嘅行程,相當黑人憎。

常見地區: 大美督、城門水塘燒烤場 (呢到係水務處私人道路,公眾車輛其實唔可以駛入)、水浪窩、北潭涌、大棠燒烤場。

延伸閱讀:《[揸車去行山] 4大熱門郊野停車場

2. 人車爭路


山野道路比起市區道路較為狹窄,唔少郊野公園禁區嘅道路,仲係行人、單車同汽車共用。當年學車師傅都有教過,因為汽車係「殺人凶器」,所以無論邊方面有錯,都一定係汽車讓行人先行。

大棠睇紅葉人潮

但係有啲人就以為揸住軚盤就係大晒,於狹窄路面高速行駛,往往險象橫生,十分危險。

常見地區: 大棠 (紅葉旺季)、城門水塘 (城門林道)、麥理浩徑第九段、大帽山道、山頂道

3. 餵飼動物

常見於金山,駛車人士又驚馬騮,又想同馬騮玩,就揸部車上金山路停低,開半邊窗然後將食物掉出,馬騮蜂湧而至。咁將唔單止整到周圍污糟晒,仲影響馬騮嘅習性,佢哋會一見汽車就走埋去,甚至破壞車輛。附近嘅停車錶位,就經常有馬騮破壞泊喺到嘅車。行經途人亦因為呢啲唔負責任嘅行為,亦令佢哋受馬騮騷擾。

餵飼野生動物屬違法,最高罰款10,000蚊。

常見地區: 金山一帶

4. 胡亂響號

山野咁寧靜,無必要都唔響咹啦。有人喺條路行緊,你咪慢慢行等人哋讓你囉,你一響咹會嚇親人架。

5. 亂拋垃圾

食完嘅零食包裝,抹完鼻嘅紙巾,隨手就丟出車外,超級討厭! 鼓勵大家見到呢個情況,記低車牌打1823投訴,車主會被罰 $1500。


文章為作者意見,不代表Fitz立場。

歡迎投稿: https://fitz.hk/contribute/

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。