4個熱門郊野停車場有幾難泊f

我山雞雖然平時都有部「錢七」代步,不過去行山嘅話,都盡量會坐巴士坐地鐵。除咗係為咗盡量製造少啲污染外,亦係因為揸架車去行山,其實比搭車仲麻煩,因為:

  1. 行山勝地通常好難搵位
  2. 揸架車去起點,行完山就要由終點去返起點攞車,意味住行山嘅路線好大機會要走回頭路。

之但係,有朋友係愛犬之人,話想車隻狗去行山,問我可以泊邊到喎。我就試下講我熟悉嗰幾個停車場啦。

烏蛟騰

4個熱門郊野停車場有幾難泊 2

  • 烏蛟騰路盡頭有20個左右合法免費停車位。若無大型活動,早上九點前都有機會搵到位。
  • 車場無位,沿烏蚊騰路兩旁都有避車處。嗱,抄唔抄我都唔知。不過呢兩年我泊過大概5次,都仲未有事嘅……

泊車難度(5星最難):2星 (指泊街)
熱門景點:吊燈籠可遠望Double Heaven嘅印洲堂,三椏村有走地雞食、荔枝窩海岸公園……

北潭涌

4個熱門郊野停車場有幾難泊

  • 北潭涌巴士總站有幾十個私家車停車位 (免入錶)。但由於北潭涌係熱門行山地點,車位難求。喺每年9月開始,行山比賽高鋒期,朝早九點去到都未必搵到位。
  • 唔少人其實行半朝已經會走,大概11點後會有一批車走。
  • 保良局度假營若無活動,會提供有日泊車位,大概100蚊。
  • 連保良局都無位,就係要沿路搵地方泊。我就試過泊到去某條村入面嘅爛地,行番北潭涌要成半個鐘!(真係揸乜鬼車丫)

泊車難度(5星最難):4.9星
熱門景點:香港三尖之一蚺蛇尖、萬宜水庫、大枕蓋、赤徑、浪茄、大浪西……… (真係多到數唔晒)

(注意:因為北潭涌實在太難搵位,有人喺停車場周圍泊。我山雞親眼見過,因為啲人太猖狂,警察call晒拖車將亂咁泊嘅車拖走。大家唔想行完山仲要去警局攞車,就咪咁狼死啦。)

大棠

呢張相肯肯定係閒日影,假期邊有咁少車呀。
呢張相肯肯定係閒日影,假期邊有咁少車呀。
  • 大棠停車場有大概20個私家車位。假期會一早爆滿,不過流動都算快,大概等半粒鐘都有位。(除非睇紅葉旺季)
  • 好多人都會泊喺燒烤場嘅路邊。不過我唔建議囉。
  • 大棠山路入口嘅餐廳對出都會有人泊。

泊車難度(5星最難):2.5星
熱門景點:大棠自然教育徑、紅葉、吉慶橋、元荃古道……

城門水塘

呢度兩邊都可以泊到8至10部車。
呢度兩邊都可以泊到8至10部車。
  • 嚴格上佢唔算係停車場,不過喺燒烤場公廁繼續往前走,到閘口前可以泊到大概10部車。而沿路平時亦會有人泊車。不過如果太多車又有人唔生性亂泊,會有警察抄牌。
  • 城門道出面嘅和宜合村,有兩個錶位停車場,行去小巴總站只係15分鐘。

泊車難度(5星最難):2.5星
熱門景點:金山、針山、草山、大帽山、城門水塘、馬騮……

今年年初三,大多人泊晒喺城市水塘嘅路邊,結果要動員警察趕車,走唔切就被罰320囉。
今年年初三,太多人泊晒喺城市水塘嘅路邊,結果要動員警察趕車,走唔切就被罰320囉。

注意事項:

  1. 記得留意泊車嘅地方有無大型活動。譬如話明知北潭涌跑馬拉松,咁停車場肯肯定唔會有位啦。可參考:Fitz.hk《香港長跑行山比賽》
  2. 真係逼不得已要泊街泊路邊,就睇清楚會唔會阻住其他車出入。我試過喺北潭涌畀個泊車L頂住,要廿幾手呔先走到!(留電話啦)
  3. 泊路邊記得留電話,真係會有好心慈母會抄牌前打畀你架。
  4. 千祈千祈千祈唔好泊巴士站,超級無品,阻人上落車。同埋巴士車長通常會報警。
  5. 盡量唔好泊車村。你唔知會唔會阻到村民出入。而據講村民會有自己嘅方式辦事……
  6. 揸車去行山真係下下策,最方便始終都係搭車。

更多:
Fitz.hk Facebook專頁
[行山考牌路線] 杯靈雙渡
[走入台北山徑] 5條捷運可達的步道
崖上的PingTing,東龍洲做營人,真美!
Fitz Hiking 行山

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。