圖: 花椒之味(台灣)

點解香港人要睇港產片? 唔係因為要抵抗合拍片或外國勢力,而係因為呢種電影語言係我哋成長一部份,同我分唔開,亦同香港作為一個家咁行落去好相似。

喺一個極端到非黑即白無中間位嘅世代,《花椒之味》的確生不逢時,一個「九唔搭八」嘅阿B,一個鼓勵填海嘅劉華,加埋一個黃絲導演麥曦欣,注定裡外受敵,票房仆直,亦無人得閒理 Sammi 嘅戲有無進步,值唔值攞影后,呢啲太平盛世嘅話題,留返拜山先講。但我忍唔住,要為呢套電影寫幾句,因為佢真係一部香港電影,改編非常香港嘅張小嫻小說,故事發生在一個本身屬於內地口味嘅重慶麻辣火鍋店 (本人至愛),座落漸漸重建的大坑區,片中中秋舞火龍連時間都夾埋,可惜香港人焦點都去了獅子山人鏈的點點光。

千算萬算,算不了時代

上一次覺得很大責任要好好寫一篇電影感言就是《空手道的麵與飯》,因為我有種跟製作團隊心靈相通的感覺,不是估到劇情,而是被劇情啟發時的領悟又在劇情裡出現。先旨聲明,我從不看張小嫻。

故事主角的爸爸阿B有三個女兒,剛好次序是港台中,每地一個,作為大女的 Sammi (如樹),一直以為拋妻棄女的爸爸不是因為媽媽病重,要負責任照顧媽媽都不會回來。她覺得這談不上愛,那只是責任。在她看來「愛」是樂意,「責任」是被迫,所以爸爸是被迫的。


當時我在想,香港人好喜歡講愛唔愛,你碗飯仲愛唔愛,你件衫仲愛唔愛,「愛」是一個實際的動詞,愛就把他保留,愛就把它吞下。香港人最大係可以問「間屋仲愛唔愛」,但一講到人,就好難講「愛唔愛」。

圖: 花椒之味(台灣)

透過 Sammi 前度劉華「道理王」幾次衝擊下,竟然爆出一句,無話唔「愛」即係「愛」,「愛」咗先會負責任。(即係愛咗層樓就要供啦,明?)

當聽完呢句對白,我就諗起葉德嫻首《我要》「我要 我要你 我要你愛」,細個唔明,唔係我要你嘅愛咩,原來呢個「愛」係可以留我喺身邊咁解。呢種想法真係同當人係 yellow object 嘅鬼佬都唔會明嘅獨有香港文化。

呢份「愛」放返喺套戲度更加係好到題,大女「愛」唔「愛」間鋪,二女仲「愛」唔「愛」打檯波,三女仲「愛」唔「愛」阿婆。三個人分別都好似有三種責任。而爸爸就將佢最愛嘅味道放咗喺個麻辣湯底裡面,因為佢「愛」唔到呢一個最愛。

圖: 花椒之味(台灣)

講導演手法,純年齡計作為一個仲叫年輕嘅導演,麥曦欣真係做到小麻小辣,點到即止,唔會有張艾嘉拍女性主題嘅刻意文藝,又唔會有黃珍珍嗰種香港男導演夾硬搞笑變兒嬉。主角係非常實際咁去 RUN 一間鋪,做到扒街,亦唔會突然吟起詩,而 Sammi 對爸爸嘅點點回憶:唔係落緊單就出緊菜,唔係洗緊碗就舞緊火龍,全部回憶都係做到無停手。最後留低嘅一把聲音,都係非常功能化嘅英文默書。

老豆從來喺香港都係咁功能化,乜都識整乜都識煮,係衰就衰在去一度「愛」一個,搞出重慶、台灣、香港三味獨女麻辣。唔講政治隱喻,至少三位女演員配搭得宜,賴雅妍同素顏 Sammi 真係餅印,李曉峰37歲都可以扮個廿零歲嘅網紅,而且各有各味道,真係無出現「劉華做戲點都係劉華」嘅問題。

唯一要挑剔嘅係三個唔係老豆死都唔知對方存在嘅女,實在 friend 得太快,呢方面嘅中港台大融合可能比較礙眼,不過亦請觀眾保持克制同理性。

圖: 花椒之味(台灣)

香港地,搞食艱難。香港地,遍地黃金。香港地,人傑地靈。香港地,得天獨厚。
幾個年代幾種說法,香港地,XXXX,總之同熱愛這遍土地。

睇完成套戲,好滿足,因為張小嫻本來就係金句王:「人生就係等一個原諒自己嘅人……」,或者我唔覺唔覺都係飲呢種香港奶水大嘅。「辣唔係一種味覺,而係用一種痛去遮蓋另一種痛」,莫非因爲咁所以我好喜歡食辣?

香港人,係咪都係繼續要加辣?

圖:花椒之味(台灣)

[獅子山精神隊2019] 繼續向高山舉目 慈善隊Tee訂購

獅子山精神隊由2016年一路走來,去過韓毅、集合精神復康嘅朋友與醫護 full team 完走毅行,嘗過40人 support team 的愛護,上過獅子山,登過富士山,走過一次又一次麥理浩徑。從香港的山,向世界出發,從不停步、愛心友情沒有止盡,並再一次下定決心,完走剛好40週年的麥徑。

今年獅子山 Tee 沿用上年設計,男女裝合併可以組合出一條完整毅行路線,而終點改成珠海學院。另外,亦特別準備了童裝。色調上是男 (藍) 加女 (紅),變童 (紫),從設計上貫徹傳承的精神。

定價方面是$200一件,$300二件,$400三件,如此類推。扣除成本約$80 (連郵費) 後,先撥捐樂施會,以確定下年參與權,並會積極考慮其他受助團體作捐款對象。

預訂截止日期為9月30日。

訂購詳情: 連結
立即訂購: 連結

Fitz連結: https://fitz.hk/?p=125828

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
熊重任
熊重任 -- TED TALK迷,醉心研究自我管理、運動與心理,工作與動力的課題,希望科學化改善個人生活,亦係一個極愛睇戲嘅算死草保險經紀。