喺香港睇星,並唔係就咁抬高頭就得。香港光污染嚴重,高樓大廈亦阻礙大家睇星,所以要睇星,第一步就要揀啱靚位。

以下位置依照 香港天文學會 排名,100為滿分。

打游擊 (唔露宿)

  1. 南大嶼山 (65-87分):貝澳、長沙、塘福、水口、石壁至分流一帶等地
  2. 北潭涌 (63分):西貢北潭涌一帶,包括萬宜、黃石碼頭一帶,總之越東越好
  3. 石澳 (54分):9號巴士站向村屋方向行十幾分鐘至大頭洲之山頭,但近年該處受將軍澳光害影響

露營/宿營

  1. 蒲台島 (76分):全港離市區燈光最遠的觀星地點,由香港仔或赤柱聖士提反灣乘街渡可達
  2. 散石灣女青年會營 (76分):長沙側,可乘巴士直達
  3. 麥理浩夫人渡假村 (72分):位於西貢北潭坳,但營地有街燈影響觀星
  4. 紅十字會石壁營 (70分):位於大嶼山石壁,巴士站步行15分鐘
  5. 長洲 (68分):環境以明愛明暉營及救世軍白普理營較舒適
  6. 北潭涌營地 (66分):包括北潭涌保良局渡假營、小童群益會黃宜洲白普理營,但營地有街燈影響觀星
  7. 西貢荔枝莊 (62分):包括明愛小塘營,由馬料水乘街渡前往


觀星5大要點

1. 望遠鏡唔使PRO

初學睇星反而唔好用天文望遠鏡,因為係睇嘅範圍比較細 (睇星雲星團較適合)。一般雙筒望遠鏡 (7/8/10倍,35/40/50毫米口徑) 已經足夠。平時唔睇星,仲可以用嚟睇演唱會同觀鳥。

呢支係8x40嘅雙筒望遠鏡。
呢支係8×40嘅雙筒望遠鏡

2. 天時:要計埋農曆

留意天氣,除咗要無雲無雨,仲要天色清朗。最佳季節當然係秋冬時份。此外,亦留意月亮盈虧,唔好喺農曆十五去睇星,因為月亮嘅光掩蓋所有星星 (真正古語有云: 「月明星稀」呀)。

呢個已經唔係滿月,但仍然光到乜星都睇唔到。
呢個已經唔係滿月,但仍然光到乜星都睇唔到

3. 位置:避開光害

整體而言,香港睇星最好嘅位置係西貢東 (如北潭涌、萬宜水庫)、港島東南 (如石澳)、大嶼山南 (如貝澳、長沙),以及部份離島 (如長洲、蒲台)。部份地方雖然偏僻,但有意想不到的光害 (如東坪洲受到大陸的燈光影響;烏溪沙、大棠受城市發展影響)。

香港光害有幾嚴重? 一眼睇晒。(來源: 香港大學「香港夜空光度監測網絡」)
香港光害有幾嚴重? 一眼睇晒 (來源: 香港大學「香港夜空光度監測網絡」)

4. 先搵最光嘅星

初學睇星,連方向都未必搞得清,可以先搵下每個季節最光最明亮嘅星座先,然後再依照星圖慢慢辨認唔同星座。口訣係:「春季大弧線,夏季大三角,秋季大四方,冬季大三角。」即係話而家係冬天,就可以先搵獵戶座、金牛座、御夫座、雙子座同大犬座,所組成嘅大三角。其實,獵戶座嘅三粒星,甚至係冬季一眼可以望到嘅星星。當你睇熟幾個星座,你對觀星嘅興趣肯定會越嚟越濃厚。(上述口訣嘅內容,可參考 太空館網頁,佢哋亦有 全年星圖下載)

冬季大三角
冬季大三角

5. 觀星要有禮貌

觀星要有耐性,亦必要喺黑暗地方進行。所以,喺觀星嘅熱門地點,盡量唔好燒烤、玩營火。而一般觀星人士甚至會使用紅色光源,以保持眼睛嘅敏銳。總之,明知人哋睇緊星,就唔好搵支電筒射嚟射去,更加唔好用閃光燈影相。

紅光唔會影響雙眼嘅敏感度。
紅光唔會影響雙眼嘅敏銳

2017天文現象

  • 8月13日 英仙座流星雨:預計最佳觀賞時間為晚上11時至翌日清晨,會有較明亮的流星,喺上半夜會較大機會睇到
  • 12月14日 雙子座流星雨:出現時間凌晨2點至3點,而且流星的速度只有中等,因此比較容易被看見

香港天文學會同埋太空館,都有定時舉行觀星活動,一大班一齊睇星,就肯定更開心。

資料來源:香港太空館香港天文學會


更多:
Fitz Facebook專頁
[睇那星] 香港最佳觀星地點
[港式浪漫] 香港3大燈塔
[新手必問] 想行山,應該去邊?
Fitz Hiking 行山

分享
Fitz

我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz.hk都會全力搜羅,同時鼓勵「郁民」齊齊參與,打造一個開放嘅運動生活資訊平台。