原來在沒有盼望的地方，才學懂盼望

Fitz嘅讀者，大家好，獅子山精神隊背後嘅故事唔知大家有無聽過，其實同唔少喺香港受精神病同情緒病嘅人一樣，都係苦苦掙扎之下，經歷咗一啲無法逆轉嘅事，然後總需要勇敢生存，重新許願。所以呢個蚊型行山組織，其中一個最想做到嘅都係吸引d連街都唔想出嘅康復者去吓郊外，同埋鼓勵照顧者自己都多出外走走，減輕一下生活重擔。如果下一步會想挑戰自己去玩比賽就當 bonus。

呢本書可以話係獅子山精神隊成立嘅前傳，今次特別收錄2017 毅行隊喺 Fitz嘅一系列文章，鼓勵想做同行者坐言起行，我相信你肯投稿講講你地喺香港嘅行山跑步故事，Fitz 都歡迎。

距離我出第一本書《盼望》都差不多十年時間，今次出《原來在沒有盼望的地方，才學懂盼望》，上半部可以話係前作十週年版，加埋同精神病康復者十年同行所見所聞嘅下半部結集成書。

唔鐘意睇字嘅，就喺呢度㩒入去訂書。送俾你身邊會睇字嘅朋友，下面可以唔使睇喇，多謝支持，感謝轉發。

關於十年又重新寫作講精神病，分享以下幾點

1. 多謝幾個年輕過我一截嘅人幫手，先可以俾我繼續咁單純地去做出版工作，有編輯KIKI (我地初相識都應該因為《盼望》），佢陀緊B到生埋B坐緊月都要照顧埋我呢個《學懂》BB嘅生產，你要知道無編輯所有嘢就只會變返一大堆字而已。另外封面、設計同排版要多謝 GRACE FU，喺佢追逐緊漫畫家夢想之際，被賦予一個漫畫化封面嘅任務，無佢看似毫無殺傷力嘅表達就遮蔽唔到書入面嗰種黑暗又能夠巧妙地洩露兩分盼望之光，編排上嘅心思就等大家發掘。當然仲有肯俾我從佢山系攝影當中任抽幾張用嘅 HINSON SIAO，d相成為每個篇章開首嘅分頁，亦提升埋本書整體格局。
2. 無乜人睇字，無乜人買書，大新聞都係講三日就過，點解仲要出書？其實出書都幾似種棵樹，世界名著係百年大樹，幾時都有人會返睇，我呢d路邊矮樹，雖然最多用嚟吸吓馬路廢氣，但係連印書、發佈、宣傳同後續嘅分享交流工作，應該要做上三年時間，先叫圓滿。
   今次希望可以放哂喺全香港所有 (至少基督教背景) cafe 或聚會點，全香港所有 (至少基督教書室) 寄賣，盼能做到喺社會角落小樹吸塵換氣嘅效果。
   所以有上述地方嘅話事人同老閣嘅聯絡，求分享，先感謝。
3. 呢個係個人回應信仰嘅一番努力，亦都係再一次宣告投入精神病復康以及防止自殺分享同陪伴工作。(因為經驗都會過時，所以先努力做好呢幾年再打算) 所以亦會對所有學校、團體、機構再次發出邀請，期望有更多分享或以「獅子山精神隊」名義協辦活動嘅機會。
4. 無耐之前嘅鑽石山斬人案，負面咁諗可能會消耗咗幾十年來反污名嘅工作 (有精神病 不等如 就會變 癲佬斬人，又好似變返係)。 但見義勇為嘅廚師，以普通人嘅觀察都睇到病患嘅悲傷，何嘗唔係帶俾所有病人同同行者希望，接納兩個字，講就簡單，做就極難，但認真去諗，世上無易事，只怕無心人。唯有唔睇少卑微嘅力量，唔放大偉大嘅願景，踏實去行出一步，再多一步。
5. 最後要多謝香港所有祝福康復者嘅團體組織、醫護社工、照顧者、同行者，無你地經年累月嘅工作，好多人喺受精神病、情緒病嘅困擾嘅時候，已經失去盼望，大家努力之餘，亦要照顧好自己。

(另外，新一套獅子山隊衣同fate合作，慈善價發售，最後截單日期30/9。訂購在此)
(2023獅子山精神隊儲襟章活動好快會公佈細節，敬請留意）