夏天戶外活動: 熱衰竭及中暑處理有異

夏天行山、跑步，身邊人往往出現頭痛、頭暈、虛脫，甚至神志不清等症狀，唔少人都將呢啲情況視為「中暑」。

實際上，於炎夏進行戶外活動，最常有「熱衰竭」及「中暑」兩個病症。而成因及處理方法甚有不同:

熱衰竭與中暑

	熱衰竭	中暑
主要成因	水份、鹽份流失過多 體能消耗過度，身體無法補充	持續運動，熱度無法散發，體內過熱
徵狀	頭痛、頭暈 多汗 體溫正常或偏低，≦ 攝氏39度 脈搏急促而微弱 神智不清甚至暈倒	頭痛、頭暈 排汗困難 體溫高，≧ 攝氏40度 脈搏急促，強而有力
處理	把傷者移至陰涼處 躺下，承高雙腳 以補充水份及鹽份 (如電解質飲品) 為最逼切目標	把傷者移至陰涼處 以半坐姿勢休息(頭部加以支撐)或躺下 以降低傷者體溫為最逼切目標

> 可參考《[向烈陽宣戰] 提防中暑及熱衰竭》

熱衰竭及中暑共同處理方法

無學過急救嘅話，臨急臨忙未必可以區分上面兩個病症。咁喺戶外遇到有人頭痛、頭暈、虛脫嘅話，又可以點處理? 以下呢啲方法，無論對熱衰竭及中暑，都可令患者減低危害:

1. 為患者降溫

• 以濕毛巾抹身，特別係頸、膝頭、手踭等關節位 (呢啲地方血管密集)
• 將患者移至陰涼地方
• 脫去多餘衣物，特別係緊身衣物
• 為患者灑水及撥扇

2. 平躺

• 中暑要「抬高頭」，熱衰竭要「抬高腿」，如果唔肯定邊一樣病症，平躺係最穩陣做法
• 躺於地下時，留意地面會唔會太熱，最好使用地蓆

3. 補充水份及鹽份

• 唔好一次過飲太多水，濕下個口就得
• 最好飲運動飲料
• 患者有胃口嘅話，都可以食少少嘢

4. 切記: 少用冰為妙

• 冰會令皮膚毛孔收縮，令患者更難排汗，所以就算用冰為患者降溫，千祈唔好將冰遍及全身。
• 用冰敷下關節位就可以

做完上面呢啲程序，如患者回復體力，徵狀減輕，可嘗試慢慢行撤至安全地方。如情況危險，必須報警求助。

資料來源: 衛生署、香港紅十字會、St.John Ambulance、山藝讀本、華人健康網