Fitz > 生活 Life > [康復香港] 抗疫定打卡? 周末行山郊遊人潮逼爆西貢
圖: Sai Kung Nightmares Facebook 專頁

一窩蜂行山,一窩蜂郊遊,一窩蜂打卡……一窩蜂做成嘅問題確實令唔少人吃不消。上次提及過有郊區村民搭唔到小巴,長洲居民因為太多賓客唔戴口罩而產生恐慌。呢次係一班西貢居民嘅怒哮。

Facebook 專頁 Sai Kung Nightmares,於星期六發表一輯相,講周末下午嘅人潮。從圖片之中,睇到大批市民逼爆窄窄嘅西貢街道,而西貢特有嘅小型食店都坐滿人。圖片所見,大多數市民雖然有戴口罩,不過疫症橫行期間,咁大批人群聚集,始終都係傳播疫症嘅溫床。

唔少留言嘅西貢居民,對呢個情況甚為擔憂,佢哋話周末嘅西貢仲多人過旺角,所以西貢居民反而出市區「避靜」。

遊客令街道、餐廳逼滿人,亦令該區交通嚴重負荷。出入九龍嘅交通喺周末時份整日都行車緩慢,而西貢碼頭一帶因為太多私家車同的士等客,小巴同巴士往往難以駛入站頭。

圖: Sai Kung Nightmares Facebook 專頁

事實上,西貢之外,大美督、三門仔、石澳、大澳、長洲、坪洲等郊遊熱點,近呢兩個月都人滿為患。

可實行短期措施

相信呢股「避疫」人潮會維持至少三兩個月,如果係咁,政府係咪可以實行一啲短期措施,令住喺該區嘅居民無咁受滋擾呢?

  1. 推行「居民乘車證」,可優先乘搭公共交通工具
  2. 在周末或假期時,加強違例泊車、亂拋垃圾、亂過馬路等檢控工作
  3. 政府對抗疫要加強宣傳,勸喻市民不要前往人多地方,甚至人與人要保持距離
新加坡在公眾地方實施「保持一米距離」措施,排隊入商場嘅人龍每個人真係隔住1米

文章為作者意見,不代表Fitz立場。