Fitz > 生活 Life > [戶外活動備忘] 防曬4大誤解 不只為美白而用
圖: cottonbro@Pexels

好多人以為,搽防曬只係為咗「美白」,為咗唔好曬咁黑,不過呢個只係一個誤解。事實上,過度曝曬太陽可傷及皮膚,而紫外線更可引發皮膚中黑色素瘤,最後成為皮膚癌。

美國奧運馬拉松選手 Deena Kastor,曾三度驗出患有黑色素瘤。Deena 話一般人都疏忽防曬作用,並且呼籲大眾做戶外活動要做足防曬工作,以及定期做身體檢查。

防曬4大誤解

誤解一: 我曬一陣之嘛

會唔會曬傷唔係睇曬幾耐,而係睇咩時間、咩地方曬。如身處於低緯度地區 (熱帶或亞熱帶)、高海拔地帶,以及中午時段,太陽光都會由較直接角度射入。呢個時間,就算曬十幾廿分鐘都足以令皮膚受傷。

天文台發佈的紫外線指數與曝曬級數

誤解二: 我已經好黑唔使防曬啦

無論膚色係點,太陽對皮膚嘅傷害都係一樣。雖然話皮膚較黑嘅人患皮膚癌機率較低,但仍有機會發生。

誤解三: 搽下啲手手腳腳為得囉

搽防曬,一定要搽喺衣服無遮掩嘅地方 (臉、手、腳),亦要留意眼、嘴唇。特別係嘴唇,其實呢個部位皮膚幼嫰,好易曬傷。

誤解四: 防曬用品支支都一樣

市面上防曬用品種類繁多,大致分為防 UVA (紫外線A光) 同防 UVB (紫外線B光) 兩大類。而防曬系數以 SPF30 以上最為理想。

圖: Retha Ferguson@Pexels

此外,更加要穿戴合適嘅衣物,例如具有防 UV 功能嘅上衣及太陽帽,亦要留意進行戶外活動嘅時間,最好係清晨以及黃昏,咁就可以避開太陽嘅傷害。

資料: Women’s Running