Fitz > 生活 Life > [跑食地圖] 跑完步飲阿坑茶

[跑食地圖] 跑完步飲阿坑茶_01作為偽文青,
要顯示胸有半點墨水及文化修養,
每篇文章都總會以書面語為依歸。
不過今次為了要表達那種地道的感覺…
對不起,我必需使用廣東口語才有親切感!

好勒,廢話少講即刻黎料!

事先聲明:如果閣下自認係港女,
(其實通常真正既死港女先唔會承認呢個事實) XD
即係個 d 本身好鬼死 elegant 乜野都要靚呀,
好鐘意食馬卡龍然後又好似貴婦咁去飲 “high tea” 個 d 呢![跑食地圖] 跑完步飲阿坑茶_02係嘞,如果妳係我上述所形容的,
本篇跑食地圖所介紹既食肆,
絕對絕對絕對地唔岩妳食!
冇錯,因為今次既餐廳係極度地踎同麻甩既朋友黎。[跑食地圖] 跑完步飲阿坑茶_03平時去酒樓飲茶都仲話係「飲茶」丫,
係好正常既。但呢個地方地踎到一個點,
你直頭會覺得淨係得 d 阿叔先會黎,
所以我唔會稱為飲茶,而係「飲阿坑茶」!
(個「坑」係指中坑或者老坑既意思,
對唔住,原諒今次有點俗,
因為真係要呢種廣東字先表達得到個意境)[跑食地圖] 跑完步飲阿坑茶_04毫無舒適既環境可言,
但偏偏就係呢種地道既地踎感覺,
俾人一種最大既親切感,
啱曬平時扮 elegant 但實質卻係 elephant嘅我!

平時呢種 style 嘅食肆都好興恃老賣老,
毫無服務態度可言的,
但當你以為傳統老店都會有呢種老人特質嘅時候,
(入面既員工真係全部都叔叔伯伯黎的)
丫我又跌眼鏡喎,原來唔係㗎囉!

入面幾位阿叔既感覺其實都 ok 親切既,
起碼唔係去食澳牛光速餐
那種毫無服務態度可言既冰冷感覺先囉。[跑食地圖] 跑完步飲阿坑茶_05同埋有時我返工返得早,
凌晨 5 點幾已經要食早餐,
大佬倒塔咁早邊度有得你食呀!?
拿,叁去壹就幫到我勒!
如果我晨咁早去食早餐時,
幾個阿叔都認得我,
會識得問我今日係咪返早,
好有人情味同親切感的。

唉唔小心扯開左,講返食物先!
話得係飲茶,
咁當然會有傳統既一盅兩件啦,
蝦餃、燒賣、牛肉球、叉燒包、蒸腸粉等等全部都係基本野。[跑食地圖] 跑完步飲阿坑茶_06傳統中式點心呢度大致上都有,
你話超好食咩,講真又未算,
但又唔算差都幾好既。
同埋個重點係佢平丫麻老細![跑食地圖] 跑完步飲阿坑茶_07平均 $14 就已經有一籠點心,
平時你去超市買盒急凍叮叮點心都要呢個價啦,
家下一樣價錢係新鮮蒸俾你食而味道唔差,
個蝦餃入面隻蝦仲食得出係爽口既,
$14 咋,咁你仲想點先!?
我食個早餐叫兩籠野再收我茶錢,
夾埋都只係 $30 左右,冇投訴啦…[跑食地圖] 跑完步飲阿坑茶_10值得一提既係呢度既馬拉糕,
我媽媽好鐘意食,因為唔係道道都有,
亦唔係度度都整得好食的。
叁去壹既馬拉糕整得好鬆軟,
就算你食曬成舊都唔會話覺得好漏,
會推介亦可以一試。[跑食地圖] 跑完步飲阿坑茶_08另外仲有大包,除左 d 極傳統既酒樓外,
大包呢種傳統點心已經唔多地方有,
不過呢度都仲食得到呀!
隻包入面有細半隻蛋,雞、叉燒同豬肉,
$14 大大個相當抵食。[跑食地圖] 跑完步飲阿坑茶_09拿但響呢度食野有一樣野值得留意,
除非閣下係一大群人咁黎食,
否則如果你好似我同媽咪飲茶咁,
得兩三丁友黎食野既話,
叫點心最好一兩籠咁叫就算,
寧願食完一輪先再叫第二輪再食過。[跑食地圖] 跑完步飲阿坑茶_11雖然唔係光速餐
但因為佢地上點心既速度都係好快,
基本上你叫完 10-30 秒內食物就會出現響枱上面,
(炒粉麵飯另計呀下)
所以為左令到點心入口都仲係熱辣辣,
最好唔好貪心,寧願慢慢食完先再叫。

[跑食地圖] 跑完步飲阿坑茶_12下次跑完步都試下過黎飲阿坑茶啦,
特別嗚謝婆娘 running buddy 陪我製作此跑食地圖
另外仲有兩名「傷者」唔跑都過黎齋食!xD

註:其實貴婦飲嘅應該系 afternoon tea 而唔係 high tea,
high tea 本身係英國勞工階層下午茶的統稱,
所以係屬於相對較低下階層,
根本係完全地唔 high class 的…
只係因為佢地用張高既 dining table 黎食,
所以先叫 high。
而貴族食 afternoon tea 係有專門既茶几,
較矮,根本係 “low tea” 先岩,
只係唔知幾時開始俾人亂叫,叫下叫下,
就叫到而家變左做 “high tea” 咁解。[跑食地圖] 跑完步飲阿坑茶_13飲食介紹
叁去壹點心粉麵飯
地址:西營盤薄扶林道 11 號,西區裁判處旁
(西營盤地鐵站 B 出口 5 分鐘左右路程)
營業時間:星期一至日 05:30 – 14:30

跑步路線[跑食地圖] 跑完步飲阿坑茶_141. 由香港大學起步,經蒲飛路去堅尼地城到西環泳棚,來回約 5 公里。
2. 由香港大學起步,沿薄扶林道到瑪麗醫院,來回約 5 公里。
3. 由香港大學起步,沿薄扶林道到瑪麗醫院,再經沙宣道或碧麗道到數碼港,來回約 10 公里。

更衣或儲物室安排
中山紀念公園體育館
西營盤東邊街北 18 號,毗鄰中山紀念公園

石塘咀體育館
香港皇后大道西 470 號,石塘咀市政大廈 5 至 6 樓

更多:
[跑食地圖] 西營盤的台式風味
[跑食地圖] 去太安樓掃街
[跑食地圖] 去寶雲道晨跑,再食大早餐!
[跑食地圖] 河上鄉豆花放題
跑食地圖@Fitz.hk
烈敏@Fitz.hk


文章為作者意見,不代表Fitz立場。