軟水樽使用及清洗5大要點

軟身水樽近年取代硬膠水樽，成為好多行山跑步朋友嘅必要裝備。呢類大多以塑膠製造嘅隨身裝備，既輕巧又方便攜帶，不過使用同清洗有頗多地方要留意。

軟水樽使用及清洗要點

1. 盡快清洗

做完運動後，除咗幫自己洗涼，亦記得盡快清洗水樽。清洗方法大概係:

• 用清水沖洗樽身，如果裝過運動飲料等含糖飲品，不妨以浸洗方式將糖份沖走
• 拆得就拆: 樽蓋、啜水口等配件全部拆開清洗
• 清洗完風乾，盡量唔好畀太陽曬

2. 盡量裝清水

糖份有機會積聚喺水樽，洗唔乾淨嘅話會令水樽發霉，或者令水樽有怪味，所以盡量避免裝運動飲料、汽水呢啲含糖嘅嘢。

3. 善用雪櫃

水樽最大敵人係發霉，發霉係因為有細菌滋生，而雪櫃 (冰格) 嘅低溫，會壓抑細菌生長，所以洗乾淨嘅水樽放入冰格，避免發霉。

4. 用後回復原狀

飲完水嘅軟身水樽，會被啜到變形 (見下圖)。如果用完唔記得「放氣」，有機會損壞水樽。做完運動後，就算未可以即時清洗水樽，都要將水樽回復原狀，

5. 避免拮穿

軟身水樽可被硬物拮穿因而漏水，所以做活動時要留意背囊裏面有無硬物會拮穿水樽。

最後，如果發現軟膠變黃，就要考慮換過一個新水樽了。