Fitz > 生活 Life > 迪士尼重開,點解樓下兒童遊樂場仲要關閉?
兒童遊樂場 封閉
圖: 政府新聞處

香港人受疫症影響超過一年,不過最令大家困擾嘅唔係疫症本身,而係政府嘅防疫政策。譬如話,香港迪士尼樂園及海洋公園已於2月中重開,當「飛越太空山」、「越礦飛車」等遊戲大排長龍時,同樣係戶外活動,點解兒童遊樂場、燒烤場同營地都係重開無期?

政府推行防疫措施有「大細超」之嫌,難免令市民有所不滿。

迪士尼樂園

市民疑惑之一: 重開迪士尼點解唔開兒童遊樂場?

有市民於網上發起聯署,「要求馬上重開康文署轄下所有兒童遊樂場」。發起聯署嘅市民表示:

「由2020年上半年開始,康文署轄下兒童遊樂場已經因防疫抗疫而全部被圍上膠帶,更甚者有不少設施同時被鐵欄及鎖鏈鎖上。時歷接近1年,全香港的小朋友都因為防疫抗疫,犧牲了最寶貴、最無可取代的童年遊玩時光、大肌肉訓練機會、以及社交能力發展!

直到2021年2月,因應疫情稍有緩和,不同的防疫抗疫措施亦開始慢慢鬆綁,康文署轄下的不同運動場所亦逐漸開放!網球場、籃球場、長者健體設施亦已解封。私營公司營運的玩樂場所,小至 Playroom,大至 Disneyland 及海洋公園亦已重開!

可恨,康文署轄下的兒童遊樂場卻遲遲未有開放。有家長向康文署查詢時,亦只獲得會「儘快處理」的回覆! 社會各界不同行業以及政府亦已有不同方案以阻止病毒傳染!康文署大可參考不同方案,並選擇/設計/整合最適合兒童遊樂場開放後的防疫抗疫措施,而非對全香港家長、小朋友玩耍及成長的需要視而不見。」

佢哋發起市民聯署,簽名會遞交至康文署,資料將於2021年4月21日銷毀。

貝澳營地
貝澳營地 圖: 康文署

市民疑惑之二:  開健身室點解唔開營地?

網上露營群組有營友去信康文署,問佢哋幾時重開貝澳營地,得到以下回覆:

貝澳營地重開
信件經當事人授權

官方講法都唔使點解釋,反而有網民就一針見血講出問題:「室內健身做運動就無問題,反而戶外空曠地方露營就有危險?」

圖: 政府新聞處

政府維持現有措施

政府於3月18日公佈最新防疫措施,繼續維持現有做法至3月31日:

「考慮到最新的公共衞生風險評估,現階段仍沒有空間進一步放寬任何措施。因此,政府會繼續維持大部分現行適用於餐飲業務處所及表列處所的規定及限制,以及有關羣組聚集及佩戴口罩的要求,為期14天至三月三十一日。」

即係話除咗營地之外,燒烤場、泳灘,以至游泳池同樣係繼續關閉。

可以憤怒但不可以習慣

政府領導抗疫至今,好多措施都令市民不滿,相信唔少香港人睇到以下呢啲措施一定硬晒 (拳頭) :

  1. 重開迪士尼、海洋公園,反而屋企樓下個公園仲被鐵鏈封閉
  2. 容許市民去郊外行山、跑步 (仲要唔使戴口罩),不過唔畀市民去海灘,去露營,去BBQ
  3. 市民可以去健身室做 workout,但唔可以去泳池游水
  4. 十幾人街頭列隊收集簽名就得,市民去法庭排隊旁聽就要食599G,位位罰$5000

疫症嘅破壞,都不及人為嘅傷害。


文章為作者意見,不代表Fitz立場。