Facebook群組 北區交通關注組 North District Traffic Concern Group 日前發帖，話上水太平邨管理處收到投訴，指有居民見到「不常見品種的老鼠於邨內跳躍，其跳躍能力卓越，能輕而易舉攀爬到單位附近」。好彩，管理處唔係認為「客戶永遠是對的」，最終糾正居民嘅誤解，話呢啲其實係松鼠。
赤腹松鼠香港常見
大家只要細心留意，好多時喺公園、郊外都會發現松鼠嘅踪跡。呢啲松鼠叫赤腹松鼠 (Callosciurus erythraeus) ，佢哋並唔係香港原生物種。說話上世紀六十年代，有商人由東南亞運入赤腹松鼠，當係寵物喺市面售賣。呢啲松鼠有啲喺運輸時走失，有啲被飼養者放生，結果留喺香港開枝散葉，成為最常見嘅香港松鼠。
根據嘉道理農場研究，發現香港嘅赤腹松鼠分為兩大品種:「安徽亞種」常見於新界北部，「泰國亞種」於港島有記錄。安徽亞種腹部顏色較淺，外觀同泰國亞種都有好大分別。
松鼠雖然都係齧齒目，同老鼠分別唔大，不過赤腹松鼠受《野生動物保護條例》(香港法例第170章) 保護，大家見到亦唔好騷擾佢哋。
去去，武器走！
