青少年進行劇烈運動要小心

蘇州一名初中生,平時唔做運動,有日突然心血來潮,一口氣做咗200下深蹲。做完之後,雙腳痠痛、身體虛脫不在話下,最恐佈係小便顏色逐漸變深,顏色似足豉油咁黑。少年父母大驚,送佢入急症室診治。

醫生檢查後,發現少年屙血尿之外,仲有大腿肌肉僵硬,診斷佢患上「橫紋肌溶解症」。醫生話,好彩呢次搶救治療及時,令少年唔會有進一步損害。如果病情嚴重,極可能引起急性腎衰竭,需終身洗腎。

少年嘅「豉油尿」

橫紋肌溶解症主因是運動過度

橫紋肌溶解症係指骨骼肌 (橫紋肌) 發生急速性損傷,令肌肉細胞壞死。肌肉細胞會釋出大量鉀離子,加上細胞釋放大量尿酸。若尿酸無法及時排出,會損害腎機能,導致急性腎臟衰竭。

橫紋肌溶解症有多個成因:

  1. 過度運動: 特別係平常無乜做運動嘅人,突然過度做運動,令肌肉過份勞損同撕裂
  2. 肌肉受猛烈撞擊: 例如交通意外
  3. 極端體溫: 如持續發高燒、低溫症患者
  4. 食物中毒、病菌感染等
負責診治呢位少年嘅常州市第二人民醫院

負責診治呢位少年嘅常州市第二人民醫院醫生話,近年因運動過度而患上橫紋肌溶解症嘅病人,通常都係青年人,近年更有年輕化趨勢,唔少兒童、幼兒都因為運動過度而入院。醫生提醒大眾,做運動要循序漸進,以免受不必要損傷。

資料: 澎湃新聞


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > 健康 Health > 初中生200次深蹲後屙「豉油尿」 橫紋肌溶解症險終生洗腎