話說，馬來西亞一名 TikTok 運動達人 (下稱為「網紅」) ，自稱喺快速測試呈陽性反應後，喺唔使隔離、唔使食「蓮花清瘟膠囊」下，用自創方法痊癒。
根據「網紅」喺 TikTok 發佈短片，佢3月2日晚上測到有陽性反應，結果全晚發燒，多汗，導致嚴重失眠。第二朝一落床，就依照佢相信嘅「跑步能醫百病」理論，有理無理落街慢跑。佢話，跑步時絲毫唔覺有異樣，呼吸無困難，肌肉亦唔會無力。而最重要就係，佢覺得做完運動一身輕鬆晒。
結果，「網紅」跑咗9.86公里，返到屋企再做檢測，結果由陽轉陰，證明佢呢套理論絕對有用咁話。「網紅」仲補充，佢呢次係第二次中招，第一次陽性就係匿埋一個人做健身，都係咁樣醫返好。
醫生: 咪害死人!
短片發表之後，立即受到大批網民圍攻，話佢帶住病毒周街跑，絕對會傳播疫症。而馬來西亞嘅醫生亦大力抨擊「網紅」，話佢亂噏! (馬來語: mengarut)。醫生話染疫必須將患者隔離，仲話患者身體機能變差，根本唔適合做劇烈運動。
醫生亦補充，佢相信「網紅」嘅快速檢測未必準確，病毒絕對唔會因為跑步而消失，佢呼籲喺快速檢測驗到陽性嘅患者，要做進一步檢測，以確定情況。
資料: Says
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
