特首話: 香港唔封關因為唔想歧視某國人。之但係面對疫症威脅,唔少國家為咗保護自己國民,都制訂唔同嘅入境限制。香港人要出國旅遊、行山,以至參加馬拉松比賽,真係要留意住各國嘅新政策。

台灣: 中港澳入境要隔離14日

台灣2月5日公佈,任何由中國大陸、香港、澳門進入台灣嘅遊客,需居家隔離14日,期間唔可以外出,就算旅遊行程只有幾日,亦唔可以喺隔離期間離境。

即係話,要參加台灣境內嘅馬拉松賽事,至少要提前14日入境,居家隔離之後先可以參加比賽。所以原定於2月7日起步嘅2020 臺北超級馬拉松,香港選手只有卻步。

此外,早前中華航空亦宣佈暫停香港往來台灣超過100班航班。

日本: 列中國大陸為高危地區

日本首相安倍晉三於2月4日明確表示,會視中國大陸為疫症高危地區,同時亦實施對中國大陸入境遊客嘅檢疫措施,對由湖北檢發嘅護照持有人,禁止入境。

至於由香港出發嘅特區護照居民,雖暫時不禁止入境,但於機場落機時,旅客需進行詳細嘅檢疫。

有準備參加3月1日東京馬拉松嘅香港跑友表示,對情況審慎樂觀。不過香港疫情緊張,亦無乜心情比賽,所以仍考慮退賽。

南韓: 禁湖北旅客入境

南韓宣佈由2月4日開始,禁止湖北旅客入境南韓。對來自中國大陸其他地方嘅遊客,會積極審視疫情再制訂相關措施。早幾日,有前往首爾嘅旅客,表示入境時需要提供可接駁南韓語音網絡嘅手機及電話號碼,用以方便當局與旅客聯絡。(下圖第4點,資料來源: 韓國旅遊問題免費幫幫幫)

而3月22日舉行嘅首爾馬拉松,大家仍採取觀望態度。

其他國家入境禁疫措拖

  • 美國: 除美國公民及其親屬,禁止過去14日到過中國的旅客入境
  • 意大利: 停止中國往返航班 (包括香港)

  • 以色列: 停止中國往返航班
  • 捷克: 暫停向中國公民發出簽證
  • 澳洲: 暫停向中國公民發出簽證
  • 哈薩克: 暫停向中國公民發出簽證
  • 新加坡: 禁止中國公民入境
  • 伊拉克: 禁止中國公民入境
  • 印尼: 禁止中國公民入境
  • 越南: 禁止中國公民入境,曾到過疫區嘅其他國家旅客需隔離14日
  • 菲律賓: 禁止中國公民入境 (包括香港及澳門)
  • 馬來西亞: 禁止湖北居民入境
  • 韓國: 禁止湖北居民入境
  • 日本: 禁止湖北居民入境
  • 台灣: 中港澳居民入境後需居家隔離14日
  • 蒙古: 關閉與中國接壤嘅邊境關閘
  • 俄羅斯: 邊境管制,禁中俄車輛往來,停止向中國公民發出簽證
  • 尼泊爾: 關閉與中國接壤嘅邊境關閘
  • 北韓: 禁止所有外國旅客入境

取消行程小心考慮

唔少人因為疫情嚴峻,就算一早book好晒機票酒店,都考慮取消行程。不過,除非進入嘅國家係疫區,香港政府對該國發出旅遊警示,否則依照一般旅遊保險嘅條款,呢個情況取消行程係無得賠! 即係話,除非你去嘅國家已實施禁止入境措施,否則自行取消行程係不在保險範圍之內。 (注意: 呢個講緊一般遊遊保險嘅條款,如果你份係特殊保險,則另作別論。)

咁如果大家係由自行,自己取消機票酒店又無得賠呢?

  • 取消機票: 視乎你買嘅機票係咩級數,一般來說特惠機票、團購機票,係無得更改航班。但因應疫情,部份航空公司已特事特辦,例如日本全日空ANA早前已向訂票客戶發出訊息,話可以無條件為客戶更改航班,可以改到年中先出發。
  • 取消酒店: 絕對視乎你用咩方法預訂,經酒店官網? 網上中介? 本地旅行社? 呢個好睇你點同嗰邊客戶服務部溝通,難以一概而論。
  • 租車、本地團: 同取消酒店嘅情況大同少異,好靠你嘅牙力,亦好靠你嘅誠意。
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。