Fitz > 新聞 News > 立法會議員證實運輸署新作風 | 長跑賽封路要有政府部門支持及提交「交通影響評估」
沙田10K河畔賽

疫情退卻,政府要說好香港,營造生活復常景象,不過長跑比賽似乎仍未ready。3月初雖然有幾個10公里賽舉行,不過就走唔出科學園,要喺白石角「倉鼠跑」。

綜合多方面消息,疫情後政府對私人機構申辦長跑比賽,同疫情前有唔同安排。有指運輸署對於封路相當「手緊」,除涉及政府部門活動,基本上都唔會批准封路跑步。所以,就算過去每年有十幾廿場嘅吐露港10公里賽,但疫情後只係得民政事務署有份舉辦嘅「大埔10K賽」,可以跑到吐露港一段行人路。

今年3月香港Guy跑的「倉鼠跑」比賽路線

亦有消息指,4月底舉行、歷史悠久嘅「沙田10K河畔賽」,有關部門要到臨起步前幾日先開綠燈,亦同樣與運輸署遲遲未審批申請有關。

日前立法會議員陸瀚民及其他議員,就同運輸署、體育專員、文化體育及旅遊局代表開會,討論申辦長跑比賽問題。陸瀚民喺 Facebook 透露更多政策細節,運輸署會唔會批准封路,將會視乎兩個因素:

  1. 比賽或活動需要得到部門的政策支持 (policy support),亦即係話唔係政府部門支持活動,將會拒絕封路。要注意嘅係,從字面上睇,呢到講嘅「政府部門」,係政府決策局以下嘅部門,就算係旅發局嘅公營機構都唔得,奧委會、田總亦唔會賣帳
  2. 無論公營或私營搞比賽,都要向運輸署提交「交通影響評估」 (traffic impact assessment),以免活動影響其他道路使用者。有行內人士稱,呢個「交通影響評估」要搵專業機構搞,郁下都要花費十幾八萬,大型活動如以往「全馬街馬」更是天文數字,而且評估報告要每年更新,今年做完出年要再做,令辦比賽嘅本大增。

當局答覆立法會話會檢討有關措施,希望政府會從善如流啦。


文章為作者意見,不代表Fitz立場。
歡迎投稿: https://fitz.hk/contribute/