我好想同大家分享一吓呢個Topic。
你地有冇幻想過如果屋企有兩個拳王，你估下你既生活會有咩變化？
係咪覺得操重野會有人做一定會好爽呢？
但事實係點由我講比大家知，呢個變化實在好恐佈，非常恐怖，恐怖到我忍唔住要寫出來～～
----- 廣告 Ad -----
太多方面既不人道變化，一次過講唔晒，不如由賽季開始操練講起。
個個都知我屋企有兩個拳王，一個係男一個係女，男既精力旺盛，女既溫婉可愛。賽季開始我家兩位拳王天未光就的我起身去晨操，我身都未轉雙眼完全睜不開拒絕起床，佢地就一個發軟功另一個就係咁轟炸我起身，又話陪我去減肥又話操少少就去食早餐，又話早D操早D返來補眠等等。。。
直至落到街都係咁話「今日輕鬆D 慢慢跑」，開頭3分鐘真係慢慢跑既，但一見大直路佢地就即刻開turbo，我全程都係死追爛追跟住佢地尾燈，深怕一走散左大家冇電話唔知點搵番。好喇，到我好辛辛苦苦咁追到佢地，以為佢地咁好停低等埋我，點知又話要練爆炸力＃＠～
我氣都未喘完又話要開始喇，又一支箭咁開波！＠＃＄～
我自問體能都唔算太差，練爆炸咪爆炸囉！大家知唔知最慘係咩？
最慘係我part住佢地我又點同佢地鬥爆炸呢T.T
我空住肚爆左十、八次咩能量系統都用乾啦，佢地係咁爆，爆足三、五十次，我唯有死埋一邊影低佢地罪證囉^^”
----- 廣告 Ad -----
爆炸完畢一心諗住去嘆個早餐抖順條氣啦，衰得佢地一個又話要沖涼先、一個又話食唔落住，結果好慘咁返到屋企飲水咋，仲要排隊沖涼同埋洗衫，結果早餐又冇得食、覺又冇得瞓，冇人性嫁，我想喊T~T
Eva@榮拳館
04年在泰國考獲專業泰拳教練資格，為本港首位國際認可女教練，現擔任榮拳館女子泰拳班之課程監督。妹妹Nana是應屆香港泰拳女拳王，老公是世界泰拳冠軍、綽號「轟炸機」的向柏榮，育有一子一女，望用旁觀者角度，分享冠軍級人馬的生活點滴、拳館、搏擊運動中的趣事。