香港虎媽虎爸，強逼小朋友做運動嘅原因，好多時並唔係為咗小朋友能強身健體，而係相信呢個入名校嘅重要條件。
有人想個囝囝入讀九龍X仁，就逼個六歲細路游水游到1500米；另一位朋友嘅四歲囡囡，佢父母覺得要操好兩文三語、鋼琴芭蕾舞之外，要學多樣體育運動，於是就逼呢位四歲小妹妹，每個禮拜日喺運動場學跑步。我唔知最後呢兩位小朋友會唔會因為咁而成為運動高手，不過聽唔過唔少Case，就因為細細個畀人逼，而大過咗反而變得討厭運動。
至於唔少人最崇敬嘅美國，呢一片又係咪樂土呢？我相信有人為咗仔女要讀大學，提升社會地位，都有人逼自己仔女做啲唔鍾意嘅嘢，但一定唔似得香港咁宣之於口，仲懶醒咁覺得自己搵到入名校嘅捷徑咁囉。
點解咁講？上網搵親子運動嘅資料，發覺美國唔少網站都講緊點令小朋友投入做運動，顯示美國細路有好多唔鍾意做運動。其中一個原因，相信有美國家長太急於將兒童打造成運動明星有關。
就以呢篇載於usafootball.com為例，佢介紹9項鼓勵小朋友做運嘅方法：
----- 廣告 Ad -----
1. 由孩子自由選擇喜愛嘅運動項目
2. 觀賞佢嘅比賽、訓練
3. 同佢一齊入場觀賞正規比賽
4. 父母同佢玩埋一份
5. 讚佢多啲
6. 揀一項你唔識嘅運動，同佢一齊學
7. 介紹啲運動明星佢識
8. 畀佢唞下，唔逼佢太多
9. 將運動變為家庭活動
對好多家長嚟講，上述呢啲所謂提議，其實只係老生常談。不過，當今香港地，唔少家長似乎唔記得兩個重要事實：
1. 係小朋友都鍾意玩，將任何嘢變為遊戲，佢就會樂於投入
2. 係小朋友都鍾意爸爸媽媽陪，父母唔落手落腳，又點會令小朋友玩得開心？
做得父母一定記得以前點同自己BB玩，只係有啲父母已將眼光放喺名校入口，忘記晒呢啲情境。
咁自己嘅子女呢？就等姐姐睇住囉。
家聯
為何要運動？去公園看看那些四五歲的小朋友，從跑跑跳跳所得來的喜悅吧！勿忘初衷，運動會令人快樂，難道我們都忘記嗎？
