Fitz > 運動 Sports > 近年F1最年輕頒獎台 是誰殺死我們的年輕人?
(左至右) 辛斯、加斯利、史杜爾

星期日 (9月6日) F1一級方程式意大利 Monza 站,上演近年最激烈賽事。喺紅牛一隊及平治車隊相繼犯錯及失準之下,前四名都由「F1新生代」奪得:

  • 第一名: 加斯利 (Gasly, 24歲)
  • 第二名: 辛斯 (Sainz, 26歲)
  • 第三名: 史杜爾 (Stroll, 21歲)
  • 第四名: 羅利斯 (Norris, 20歲)

賽道上嘅戰況固然好睇,不過賽事背後嘅故事亦值得一講。完賽之後,唔少車手都無返維修站休息,反而排晒隊恭喜呢位第一次拎到分站冠軍嘅Gasly。

當中最令人感動嘅一幕,可說係中途大炒車要退賽嘅法拉利車手陸克萊,賽後佢換好晒衫走出跑道,同 Gasly 來個深情擁抱。

陸克萊 (紅衫)

車手成長有血有汗

可能大家以為,呢班車手都係玩緊畀面派對,猶如當年金曲頒奬禮賽關心妍狗衝恭喜關菊英攞獎一樣。不過,係如果了解F1車手嘅成長歷程,就明白佢哋之間嘅感情絕對唔簡單。

2010年 Gasly (右) 14歲,同陸克萊 (中) 齊上頒獎台

就以 Gasly 為例,佢10歳開始玩小型賽車,15歲參加 F4 賽事,然後參加 GP2 賽車,到19歲成為F1車手。可以話,佢整個成長時期都要離鄉別井,離開家人投入賽車運動。而陪佢一齊成長,就係已經喺 Karting 一齊鬥車嘅呢班朋友。大家或者喺賽道上你爭我奪,不過都有一個共同目標,就係要贏得最高級別嘅 F1 冠軍。今次 Gasly 企上頒奬台最高位置,呢班大家一齊成長嘅車手,相信會由衷替佢開心。

世界是你們的

賽後整個賽車場,無論車手同工作人員 (因為疫情,現場無觀眾),都難掩興奮之情。其中名宿畢頓 Button 喺賽後訪問環節亦話:「咁多年未見過頒獎台全部都係後生仔!」

當然,一場比賽唔代表係乜,不過年輕人代表著未來、代表著希望,大家嘅興奮絕對不足為奇。

「世界是你們的,也是我們的,但是歸根結底是你們的。」毛澤東 (1957)

可惜嘅係,身處香港嘅年輕人,往往被視作仇人,要打壓、要拘禁,連12歲嘅小妹妹都被認為有攻擊性,要向佢動武。黑白不分,指鹿為馬,人世間最可悲莫過於此。


文章為作者意見,不代表Fitz立場。