Fitz > 運動 Sports > 攀石 Climbing > [攀石意外案例分析系列] 第一章: 攀石意外可否避免?

《攀石意外案例分析系列》: 第一章

近來身邊的攀石朋友接二連三出意外,要入院治療休養一段長時間,但相信康復可以繼續攀石,算是「不幸中的大幸」。有見及此,就寫呢篇文章同大家解構案例,從意外中學習。由於案例太多,會分幾個章節同各新手、老手分享並討論一下!

可以大膽說,90%的意外都係人為造成,例如事前無檢查清楚,climber 同belayer 無做好溝通,忽視路線及場地嘅隱藏危機等,呢D都係新手、老手常犯既錯誤,尤其係老手,所以小編日後都會多加注意。

常犯錯誤一: 唔記得打繩尾結

上年發生咗一次嚴重意外,正係因為冇打繩尾結,可能大家都有耳聞……

事發有師兄幫其他攀友收野 (clearing) 時,冇為意條繩唔夠長,又唔記得打繩尾結,係 lower 時,在第一口 bolt ground 咗 (下墮地面),最後要由直升機吊走,而傷者直到現在仍在復原中……

所以,每次記得要打繩尾結! 打繩尾結! 打繩尾結! 重要野要講三次! 仲要留意繩的長度。

圖: Wilderness Explorers HK Facebook 專頁

常犯錯誤二: 攞繩過多

某日收到友人的 WhatsApp,提到一宗攀石意外。事緣一位 climber 在入第3 口bolt 時跣腳 ground咗,需由直升機吊走送院!後診斷為開放性骨折,要留院療養。

攀開石既朋友都應該知道,一般情況下,頭3 口bolt係最危險,原因係如果條繩長度控制得唔好,如climber 抽一大手繩而未能入到 Quick Draw (QD) 而導致 overrun 太多,或 belayer 比繩太多,當climber 要 fall,就會有機會 grounding (直墮地面) !

點解嘅?

第一個 bolt 攀至第二個 bolt 相隔1.5米, 入第二口 bolt 時拉一手繩通常多1米,即2.5米,如果係呢個時候 fall 咗, 連繩本身嘅延伸,fall 的直線距離就會超過3 米,好大機會就會grounding! 受傷程度輕則扭傷,重則骨折,最嚴重可能盆骨骨折或脊椎受損!

咁可以點解決?

入繩時其實無需要咬繩 (係,雖然好污糟,但好多 climbers 都習慣咁做),而係爬到個bolt同腰位成水平位置,先好入繩;同時,belayer 亦需時刻留意住 climber,隨時有fall既準備,及早收虛繩,減少墮地嘅可能。不過,你哋一定話「講就易,做就難!」,係,但盡做啦,一次意外,足以致命!

圖: Wilderness Explorers HK Facebook 專頁

常犯錯誤三: 著住拖鞋belay

是咁的,話說某年某日某地點,小編聽到一聲「呀!」的慘叫後,走去看個究竟,當時已經見到「人在地」,抱住隻腳叫痛、表情痛苦!

還原事發經過:Climber 已完成攀爬做clearing ,由於第一口同第二口 bolt 相距較遠, 而線路屬於overhang ,很難做last two 回收,所以climber 決定沿繩逐一回收, 直至最後一隻, climber係未同belayer 溝通情況下放手向後swing,而climber 亦未解除連結條繩既QD Guide 因而連同個QD guide一齊swing out 。

等小編解釋一下由於線路屬overhang ,anchor 位會在外突出, 所以回收最後一口QD 會swing out ,而當時climber 隻QD guide 仍然連結belayer 繩上,當climber swing out 既同時亦會扯埋belayer 出去,而當時雖然belayer亦有準備動作,swing out 力量具大,而belayer 當時只著拖鞋,被拖行隻腳撞石 OMG !

經小編檢查傷勢後,有外傷流血,亦懷疑骨折。經初步包紮後,由於傷勢並非嚴重,決定先揹傷者到達碼頭,再報救護處理。

點避免?

溝通好重要,因為攀石時climber同belayer 生命已經連繫住大家,良好通係必須。Climber回收最後一口時確保已QD Guide解除攀爬Overhang或Transverse路線時應該follow方法收扣。

仲有,belay嘅時候,請著返對密頭鞋,涼鞋唔計㗎!

我強烈建議戶外攀手都要學習基礎急救知識, 有埋野外急救資格就當然更好。未來,我會分享一下野外急救嘅小知識!

Wilderness Explorers HK Facebook 專頁


文章為作者意見,不代表Fitz立場。