Day 5 鹿野 →  花蓮 160km

為咗追返落後嘅進度,我哋踩咗近160公里趕到去花蓮!食早餐睇到報道話呢個星期熱浪侵襲,係台灣十年一遇最炎熱嘅天氣,台北每日都有35度。貴人出門招風雨,但係我哋就招熱浪。(謎音:都唔知我哋係咩人喇!)

終於嚟到傳說中嘅伯朗大道喇,話說金城武係呢度拍過廣告所以出名。我哋趁朝早人少少就影相留念先!

之後遊客愈來愈多,所以我哋就出發去池上鄉。池上鄉旁邊有個大坡池,望住湖光山色,格外心曠神怡。湖邊仲會噴水,我哋即刻踩過去降下溫!

去到中午,我哋去到著名嘅池上飯店食正宗嘅鐵路便當,遊客多到位都差D搵唔到。

離開熱鬧嘅池上鄉後,繼續喺烈日下前進!台灣單車環島嘅好處係補給點多,除咗便利店之外,連警局都開放畀我哋入去斟水飲。


話說當傍晚開始到花蓮,途經便利店,點解差唔多所有乾糧(例如麵包,香蕉)都缺貨,只係淨返InJelly?原來因為上個星期打風,蘇花公路因為泥石流封閉,令來往花蓮同宜蘭交通中斷,物資短缺。面對呢個突如其來嘅消息,咁點算好呢? 唔通我哋要搭火車去宜蘭,就此與蘇花公路緣盡? 我哋睇到新聞,話蘇花公路會間歇喺日間單線行車,即係蘇花公路會開,不過可能要排隊同塞車。除咗時間之外,安全亦係考慮因素之一。點都好,我哋都要做最壞打算,去花蓮火車站望下有咩車搭。

原來台鐵對自行車有唔少限制,例如某種列車係唔畀單車入,有D就要預約,係好煩好煩,搞好耐都搞唔清楚。唔理喇! 食飽晚飯先算! 為咗慰勞自己完成都四分三嘅旅程,我哋專程去食花蓮第一名嘅美式餐廳同行夜市添。(依家睇返都好想再食多次⋯⋯)

最後就去溫泉酒店放鬆休息下。(係呀,我哋係好鍾意浸溫泉。)


更多:
Fitz Facebook專頁
[七天單車環台遊記] Day 4 四重溪 鹿野 128KM
[七天單車環台遊記] Day 3 高雄 四重溪 95km
[七天單車環台遊記] Day 2 嘉義 高雄 120km
[七天單車環台遊記] Day 1 台北 嘉義 286km
[七天單車環台遊記] Day 0 瘋狂的計劃
Fitz Cycling單車

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
Ho Lam
九十後傻小子,人愈大愈坐唔定,想用有限時間燃燒青春,鍾意做GYM,行山,打泰拳,划艇,爬龍舟,游水,踩單車同去旅行。