沙田單車徑
攝於牛年年初四下午

疫情之下,唔少市民都選擇進行戶外活動,郊外山徑固然逼爆人潮,長洲、橋咀洲、塔門呢啲外島,更係插針難入。至於踩單車熱門地點沙田,亦湧入大批假日單車手。

由沙田往吐露港必經之地,俗稱「孖橋」嘅一帶單車徑,經常發生混亂情況。大致而言,有段路面大家要留意:

1. 水廠街

呢段路,單車同行人共用狹窄路面,中間亦無分隔,行人沿綠色地面走,單車要踩上紅色單車徑。不過因為假日太多單車關係,會逼使單車徑踩上綠色地帶,對行人或跑步人士相當危險。

2.「孖橋」雙子橋

沙田雙子橋

「孖橋」又稱雙子橋,一共有兩條橋,一條供單車行駛 (西橋),另一條只限行人 (東橋)。不過唔少單車手貪方便,就會踩入東橋,造成混亂。

3. 馬場對出

左邊有單車會直衝上斜轉急彎,匯合地點會有啲危險。

指「孖橋」盡頭嘅一路面。路口設計令由沙田往大埔嘅單車視線受阻,容易發生意外。加上呢個位往往有好多單車手停泊等人,假日混亂非常。

位置圖

避免意外嚴守3大法則

上面路段出現嘅問題,主要都係因為人流太多導致,加上道路設計有問題,致使情況更為混亂。作為道路使用者,其實亦要做好本份,先可以避免意外。

1. 留意等候地點

單車徑唔會有雙黃線,停車等候係唔會有警察抄牌,不過喺狹窄嘅單車徑等人、聚集,絕對會阻塞交通。所以,想停低、要等朋友,甚至尋找走失小朋友,麻煩行去闊落啲嘅路面,最佳等人地點,好似話孖橋、馬料水碼頭。

沙田白石角
最佳等位置,有空曠路面,有廁所。上行山路記得落車推。

2. 留意路牌、地面顏色

行人以及踩單車人士,都需要遵守交通規則,留意路牌指示。而單車就依紅字嘅單車徑,行人就行綠色地面。

3. 睇唔通咪加速

假期單車徑人多車多,喺睇唔通嘅時候唔好發力加速,以免有人突然衝出而發生意外。

總之,無論係踩單車、跑步,以至散步,路上行走都要注意安全,大家小心就可以避免意外。


文章為作者意見,不代表Fitz立場。
歡迎投稿: http://fitz.hk/contribute/