圖: Korea Times

去韓國踩單車計劃就來自一單「南韓建五千公里單車徑貫穿全國」嘅新聞,當地政府話會擴展單車徑,咁先知道原來韓國有一條幾完善單車網絡,終於係2019年4月出發踩一踩,揀4月因為可以睇埋櫻花啦,成個行程係2019年4月4日至4月11日,當中實際踩係4月5日至4月10日,6日就踩完,算係一條唔太長容易完成嘅路線。

行程日誌

4月4日- 到達金浦
4月5日 (Day1) -金浦-楊平郡 (100km)
4月6日 (Day2) -楊平郡-忠州 (102.5km)
4月7日 (Day3) -忠州-店村 (91km)
4月8日 (Day4) -店村-大邱 (137km)
4月9日 (Day5) -大邱-南旨邑 (91.5km)
4月10日 (Day6) -南旨邑-釜山 (105.5km)

交通篇

航班方面我係搭乘大韓航空 (Korean Air),因為佢寫到明單車托運23kg免費(依家好似32kg),作為第一次帶單車出遊,實測完之後都滿意大韓航空服務,兩邊 check-in 都順利。

去到仁川機場,由於第一晚我揀左住地方係金浦機場附近,本身計劃坐機場鐵路係金浦機場站落車再轉首爾地鐵,但發覺係搬運單車方面遇到好大問題,所以臨時決定搭巴士,咁仁川機場都當然方便,要搵巴士路線都唔難,所以我往返仁川機場都係搭巴士,當然司機見倒咁大件野果時都面有難色,同埋佢地唔會同你溝通倒,所以最好搵定落車個站名,有咩就遞去司機或者站務員,好過雞同鴨講。

提一提就係機場鐵路其實可以上單車,有單車專用車卡,但係首爾地鐵就唔可以上單車,所以要留意

至於由釜山返黎首爾我係搭長途巴士,時間大約5個鐘左右,主要原因係我無辦法確定 KTX 或者其他鐵路交通係咪可以上到單車,而用咩交通工具會影響我最後係釜山住的地方,為左安全起見,我揀左搭長程巴士,而為左方便,所以住嘅地點係遠離市區嘅沙上站附近,因為返首爾巴士站就係果邊,亦都近住單車線,反而如果釜山中心區同單車線就有一段距離

住宿篇

喺搜集資料時候,知道 motel,即係汽車旅館係果邊係好 common,同埋小城市都會有,可以去到先 walk-in,所以除左首爾同釜山之外,其他地方我都係去到先揀間 motel,一般黎講價錢係35000-45000圜之間,同埋入住時問下佢包唔包埋洗衫,如果唔係就要自己去搵自助洗衣店洗衫,幾日行程,唯一係得1間唔包洗衫。因為 motel 一般都自己做返清潔,所以都會有洗衣機,有啲會帶你去佢地洗衣房你自己搞掂,亦有啲叫你比啲衫佢幫你搞掂。

至於首爾方面,主要我就搵間近車站同埋可以比我寄存單車盒嘅住宿,之前都通過 email 同 Facebook 嘗試喺首爾搵,但係都唔啱心水,有啲又無回覆,最後揀左金浦有間叫洋子之家 – 青年旅舍 (NaNa House),因為睇相見倒佢空間幾大,應該可以比我放單車盒,事實亦證明係一個唔錯選擇。

必選 app

Naver map

必需,因為Google map係韓國係冇用,Naver map亦都有中文功能,雖然d譯名怪怪地。而且亦都可以好似Google map咁search倒附近的住宿同食肆。更重要,佢係可以顯示bike map,即係show埋單車徑路線,咁就唔驚迷路

Google Translate

由於本人唔識韓文,所以去食野就係最大問題,離開首爾,都唔洗旨意其他地方有中英文餐牌,亦都唔會有圖睇,淨係得韓文餐牌雖然我覺得 Google Translate 都係 translate得麻麻,但都冇辦法啦。

所以最好都搵定幾個有關飲食嘅韓文 app,最好有埋圖,咁去到食肆就直接比老闆睇算,咁自己覺得依招都好好用,起碼每餐都幾滿意。

每日開支 Day 0

  • 買T money  4000
  • 仁川機場-金浦 (巴士)  5000
  • 食物 (水、小食) 3650
  • 午餐 6000
  • 晚餐 7000
  • 其他 4500
  • 住宿 HKD110

待續……

> 上篇: [單車旅遊] 首爾釜山國土蹤走 準備篇
> 下篇: [單車旅遊] 首爾釜山國土蹤走 Day 1


文章為作者意見,不代表Fitz立場。

歡迎投稿: http://fitz.hk/contribute/

可樂哥
作者簡介: 一位90後愛好踩單車及行山,曾經完成台灣環島,豬三角單車遊,同埋韓國單車行,國外行過富士山,雖然經驗尚淺,希望第日有更多機會可以嘗試各種活動