謝霆鋒「懸空呼拉圈」有姿勢無實際?

前加籍藝人謝霆鋒，呢兩日upload咗條新片上網，內容係佢玩「懸空呼拉圈」，仲要chok住靚樣自拍:

霆鋒 fans 當然睇到wow wow聲，大叫好型好chok，不過做到呢個動作，又代表咗啲咩呢?

台灣媒體訪問健身教練，指呢個動作超級危險，因為上下肢一定出力最多，由臀肌以至核心都要控制得好好，如果用錯力，就隨時會受傷，傷及腰椎。教練仲話，呢個動作並唔常見，除咗扮型之外，無乜特別作用。

本地媒體亦引述外科醫生嘅講法，話呢套作令每個脊椎嘅椎間關節壓力會非常大，易造成椎間盤突出，及損傷脫位，並呼籲一般人唔好跟住嚟做。

其實做運動應以安全先行，如果要鍛練腰部力量，有大把動作、大把器械都可以達到目的，無需要冒住受傷嘅危險去鍛練身體。

「衣架晾意粉」

----- 廣告 Ad -----

謝霆鋒由出道至今有好多「神技」，被稱為有姿勢無實際。做歌星年代有「單線solo」; 到早幾年玩煮飯，又有「切蔥摩打手」、「衣架晾意粉」。而呢套「懸空呼拉圈」神技，唔知大家又點睇呢?