菲律賓男子違反防疫宵禁令，被罰深蹲300下後死亡

英國BBC報導，菲律賓呂宋甲米地省 (Cavite Province) 一名男子，上星期四 (4月1日) 一名叫 Darren Manaog Peñaredondo 嘅男子，因為違反防疫宵禁令，喺晚上6點後外出買水，被警察處罰做深蹲，完成300下後返屋企昏迷死亡。

喺 Facebook 透露事件親戚 Adrian Lucena 話，Darren 當時同其他違反宵禁令嘅人，一齊被罰做類似深蹲嘅動作100次，而且要多人同時完成先計一次，結果佢哋總共做咗300下。Darren 喺清晨6點返到屋企後，星期五全日都郁唔到，連企起身都有問題，基本上全日都要喺地上爬。不過，由於 Darren 話只係身體痛，所以大家都唔太在意，點知佢之後突然昏迷停止呼吸，無耐更證實死亡。

事實上，菲律賓現正處於疫情高峰，多個省市都實施宵禁及封城令，菲律賓總統杜特爾特上星期四更公開講過，如果有人違反封城令，警方及軍人可以開槍打死佢哋。不過，當地市長 Ony Ferrer 就話，已經下令徹底調查，仲以「酷刑」嚟形容今次事件；警察局長就表示無落實過有呢個懲罰，認為有人失職。

菲律賓警察嘅質素，香港人都知道有幾好，唔知佢哋同病毒，邊個先係恐怖啲呢?