最近有媒體引述九巴嘅消息，話雖然九巴喺疫情期間生意大減，不過多條郊遊線不跌反升，其中最近增加班次，來往大埔至烏蛟騰嘅假日路線275R大受歡迎，客量上升約20%。同一時間，九巴正計劃增設直達萬宜水庫東壩嘅巴士，現正與運輸署研究中。

不過，萬宜東壩係咪需要巴士服務? 呢個問題極有爭議。

萬宜水庫東壩 黑的溫床

近年萬宜水庫擠身香港地質公園行列，吸引唔少市民到訪，加埋呢處亦係行山露營熱門位置，所以每逢周末、假期嘅日落前後，萬宜東壩都擠滿市民；有人選擇行出北潭涌，有人等的士出市區。唔少無良的士司機，都會趁呢個時候獅子開大口，出北潭涌每位$100，比起照錶計高幾倍價錢。

因應市民需要，運輸署年前開設北潭涌至東壩小巴線9A，不過班次疏落，未能於繁忙時間疏導遊客，亦因為上述問題，令巴士公司試圖將版圖擴至東壩。

人車爭路危險

圍繞萬宜水庫嘅萬宜路，係往東壩必經之路，屬私家車禁區，除咗公共的士以及獲授權人士，外間車輛不得進入。馬路單線雙程行駛，彎多路窄，部份道路同行人共用，所以無論係巴士迷、行山人士，對於呢條巴士線都極為擔憂:

• 由於單線雙程、彎多路窄嘅問題，九巴現有巴士車種，並不適合行經萬宜路。若遇到對頭車，大型巴士難以閃避，製造塞車問題 (巴士迷話九巴可借用龍運巴士嘅小型巴士)
• 萬宜路屬麥理浩徑第一段，有大量行山人士使用。開放巴士線令呢條路更多車，對行人構成危險，亦造成空氣污染

唔少行山友認為，萬宜東壩嘅美景，應該要用雙腳去感受。如果開設巴士線，會令郊野遊人太多，破壞郊野寧靜。

資料: 東網

---