最近有媒體引述九巴嘅消息,話雖然九巴喺疫情期間生意大減,不過多條郊遊線不跌反升,其中最近增加班次,來往大埔至烏蛟騰嘅假日路線275R大受歡迎,客量上升約20%。同一時間,九巴正計劃增設直達萬宜水庫東壩嘅巴士,現正與運輸署研究中。

不過,萬宜東壩係咪需要巴士服務? 呢個問題極有爭議。

萬宜水庫東壩 黑的溫床

圖: Pal Borisu
近年萬宜水庫擠身香港地質公園行列,吸引唔少市民到訪,加埋呢處亦係行山露營熱門位置,所以每逢周末、假期嘅日落前後,萬宜東壩都擠滿市民;有人選擇行出北潭涌,有人等的士出市區。唔少無良的士司機,都會趁呢個時候獅子開大口,出北潭涌每位$100,比起照錶計高幾倍價錢。

因應市民需要,運輸署年前開設北潭涌至東壩小巴線9A,不過班次疏落,未能於繁忙時間疏導遊客,亦因為上述問題,令巴士公司試圖將版圖擴至東壩。

人車爭路危險

萬宜路 圖: 維基百科

圍繞萬宜水庫嘅萬宜路,係往東壩必經之路,屬私家車禁區,除咗公共的士以及獲授權人士,外間車輛不得進入。馬路單線雙程行駛,彎多路窄,部份道路同行人共用,所以無論係巴士迷、行山人士,對於呢條巴士線都極為擔憂:

  • 由於單線雙程、彎多路窄嘅問題,九巴現有巴士車種,並不適合行經萬宜路。若遇到對頭車,大型巴士難以閃避,製造塞車問題 (巴士迷話九巴可借用龍運巴士嘅小型巴士)
  • 萬宜路屬麥理浩徑第一段,有大量行山人士使用。開放巴士線令呢條路更多車,對行人構成危險,亦造成空氣污染
萬宜水庫東壩

唔少行山友認為,萬宜東壩嘅美景,應該要用雙腳去感受。如果開設巴士線,會令郊野遊人太多,破壞郊野寧靜。

資料: 東網


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 九巴計劃增設萬宜水庫東壩路線 網民憂大堵塞